തിരുവനന്തപുരം: സംസ്ഥാന മന്ത്രിസഭയില് അംഗമായിരിക്കെ ഒരു വിദേശ രാജ്യത്തേക്ക് കേരളത്തിലെ ഒരു പത്രം നിരോധിക്കണം എന്നാവശ്യപ്പെട്ട് കത്തെഴുതിയ കെടി ജലീലിന്റെ നടപടി പ്രോട്ടോകോള് ലംഘനമാണെന്ന് ബിജെപി സംസ്ഥാന അദ്ധ്യക്ഷന് കെ.സുരേന്ദ്രന്. ഒരു നിമിഷം പോലും എംഎല്എയായി തുടരാന് അദ്ദേഹത്തിന് അവകാശമില്ലെന്നും തിരുവനന്തപുരത്ത് നടത്തിയ വാര്ത്താസമ്മേളനത്തില് അദ്ദേഹം പറഞ്ഞു. രാജ്യത്തെ ഒരു സംസ്ഥാനത്തിലെ മന്ത്രിക്കും ഇങ്ങനെ ഒരു കത്തെഴുതാന് അവകാശമില്ല. വിദേശ കോണ്സുലേറ്റുമാരുമായും വിദേശത്തെ ഭരണാധികാരികളുമായും കേന്ദ്രവിദേശകാര്യ വകുപ്പിന്റെ അനുമതിയോടെയല്ലാതെ ഒരു ബന്ധവും പാടില്ലെന്ന ചട്ടമാണ് കെടി ജലീല് ലംഘിച്ചിരിക്കുന്നത്. രാജിവെച്ചില്ലെങ്കില് നിയമസഭാഗംത്വം റദ്ദാക്കാന് മുഖ്യമന്ത്രി തയ്യാറാകണം. സ്വര്ണ്ണക്കള്ളക്കടത്ത് കേസിലെ പ്രതികളുമായി ജലീല് ബന്ധം പുലര്ത്തിയിരുന്നുവെന്ന് തെളിഞ്ഞതാണ്. ഈന്തപ്പഴത്തിന്റെ മറവില് അദ്ദേഹം സ്വര്ണ്ണം കടത്തിയെന്ന കേസ് നിലവിലുണ്ട്. നിയമവിരുദ്ധ പ്രവര്ത്തനം നടത്തുന്നത് പതിവാക്കിയ വ്യക്തിയാണ് ജലീല്. സ്വപ്ന സുരേഷിന്റെ മൊഴില് പറഞ്ഞ ഒരു കാര്യം അദ്ദേഹം സമ്മതിച്ചു കഴിഞ്ഞു. മറ്റ് കാര്യങ്ങള് കൂടി അന്വേഷിച്ച് സത്യം തെളിയണം. ജലീലിന്റെ മതേതരത്വം ഒരു മുഖംമൂടി മാത്രമാണെന്നും അതുകൊണ്ടാണ് രാജ്യത്തെ നിയമങ്ങളെ അദ്ദേഹം ബഹുമാനിക്കാത്തതെന്നും സുരേന്ദ്രന് പറഞ്ഞു.
സ്വര്ണ്ണക്കടത്ത് കേസില് ഇഡി അന്വേഷണം തടസപ്പെടുത്താന് സംസ്ഥാന സര്ക്കാര് ശ്രമിച്ചതുകൊണ്ടാണ് കേസ് ബാംഗ്ലൂരിലേക്ക് മാറ്റാന് ഇഡി സുപ്രീംകോടതിയില് ആവശ്യപ്പെട്ടത്. എന്നാല് പ്രതിപക്ഷ നേതാവ് ഇഡി അന്വേഷിക്കണ്ട കാര്യമില്ലെന്ന് പറയുന്നത് മുഖ്യമന്ത്രിയെ സഹായിക്കാനാണ്. ഇവര് രണ്ട് പേരും ഒത്തുതീര്പ്പ്കാരാണെന്ന് വ്യക്തമായിരിക്കുകയാണ്. തന്നെ സഹായിച്ചതിനാല് മുഖ്യമന്ത്രി പരസ്യമായി സതീശനെ പ്രശംസിച്ചിരിക്കുകയാണ്. കെ.സുധാകരനും ഇതേ നിലപാടാണോയെന്ന് അദ്ദേഹം വ്യക്തമാക്കണം. സ്വര്ണ്ണക്കടത്തില് ഇഡി അന്വേഷണം ശക്തമാക്കണമെന്ന് ആവശ്യപ്പെട്ട് സമരം ചെയ്യുന്നവരാണ് കോണ്ഗ്രസുകാര്. അപ്പോള് പ്രതിപക്ഷ നേതാവ് സിബിഐയാണ് അന്വേഷിക്കേണ്ടത് എന്ന് പറയുന്നത് എന്ത് അടിസ്ഥാനത്തിലാണ്. സംസ്ഥാന സര്ക്കാര് പ്രതിരോധത്തിലായി നില്ക്കുമ്പോഴാണ് അവരെ സഹായിക്കാന് സതീശന് വരുന്നത്. സതീശന് പിണറായി വിജയന് സര്ക്കാരിന് ഒരു കൈത്താങ്ങാവുകയാണെന്നും ബിജെപി അദ്ധ്യക്ഷന് പരിഹസിച്ചു.
പിണറായി മന്ത്രിസഭയിലെ മന്ത്രി ആന്റണി രാജു കോടതിയില് നിന്നും തൊണ്ടി മുതല് കട്ട് അതില് ക്രിതൃമം കാണിച്ച് ലഹരി കടത്തിയ വിദേശ പൗരനെ രക്ഷിച്ചെന്ന് വ്യക്തമായിരിക്കുകയാണ്. കോടതിയെ പോലും വഞ്ചിക്കുന്ന മന്ത്രിമാരാണ് കേരളത്തിലുള്ളത്. രാഷ്ട്രപതി തിരഞ്ഞെടുപ്പില് കേരളത്തില് നിന്നും ദ്രൗപതി മുര്മുവിന് ലഭിച്ച വോട്ട് ആകസ്മികമല്ല. ബിജെപി സംസ്ഥാനത്തെ എല്ലാ എംപിമാര്ക്കും എംഎല്എമാര്ക്കും കത്തയച്ചിരുന്നു. സാമൂഹ്യനീതിക്ക് വേണ്ടിയാണ് ദ്രൗപതി മുര്മുവിന് വേണ്ടി കത്തയച്ചത്. ഇന്ത്യയില് എല്ലാ സംസ്ഥാനത്ത് നിന്നും ദ്രൗപതി മുര്മുവിന് വോട്ട് കിട്ടി. ദേശീയ താത്പര്യത്തിനൊപ്പം നില്ക്കുന്നവര് കേരളത്തിലുമുണ്ടെന്ന് മനസിലായി. കേരളത്തിലെ രാഷ്ട്രീയവും ദേശീയ രാഷ്ട്രീയത്തിനൊപ്പം മാറാന് ഇനി അധികം സമയം വേണ്ടിവരില്ലെന്നതിന്റെ സൂചനയാണിതെന്നും കെ.സുരേന്ദ്രന് കൂട്ടിച്ചേര്ത്തു. വാര്ത്താസമ്മേളനത്തില് സംസ്ഥാന ഉപാദ്ധ്യക്ഷന് സി.ശിവന്കുട്ടി, ഒബിസി മോര്ച്ച സംസ്ഥാന ജനറല് സെക്രട്ടറി പൂങ്കുളം സതീഷ് എന്നിവരും സംബന്ധിച്ചു.
