മുംബൈ: ഉദ്ധവ് താക്കറെയുടെ ഗുണ്ടായിസം മഹാരാഷ്ട്രയില് അവസാനിക്കേണ്ടതുണ്ടെന്നും ഇതിന് ഉടനടി രാഷ്ട്ര പതി ഭരണം ഏര്പ്പെടുത്തണമെന്നും കേന്ദ്രത്തോടാവശ്യപ്പെട്ട് എംപി നവനീത് കൗര് റാണ.
വിമത ശിവസേന എംഎല്എ തനജി സാവന്തിന്റെ ഓഫീസ് ശനിയാഴ്ച ഉദ്ധവ് താക്കറെയുടെ അനുകൂലികളായ ശിവസേന പ്രവര്ത്തകര് തല്ലിത്തകര്ത്തിരുന്നു. “ഉദ്ധവ് താക്കറെയെ വിട്ട് പോകുന്ന എംഎല്എമാരുടെ കുടുംബങ്ങള്ക്ക് സുരക്ഷ നല്കാന് ഞാന് കേന്ദ്രമന്ത്രി അമിത് ഷായോട് ആവശ്യപ്പെടുന്നു. എംഎല്എമാര്ക്ക് സ്വന്തമായ തീരുമാനമെടുക്കാനും ബാലാസാഹേബിന്റെ ആദര്ശവുമായി ബന്ധപ്പെട്ട് നില്ക്കാനും സാധിക്കണം. ഉദ്ധവ് താക്കറെയുടെ ഗുണ്ടായിസം അവസാനിപ്പിക്കണം. ഇവിടെ രാഷ്ട്രപതി ഭരണം ഏര്പ്പെടുത്തണമെന്ന് ആവശ്യപ്പെടുന്നു”- നവ്നീത് റാണ പറഞ്ഞു.
മസ്ജിദില് വാങ്ക് വിളിക്കാന് ഉച്ചഭാഷിണി ഉപയോഗിക്കുന്നത് തടഞ്ഞില്ലെങ്കില് ഉദ്ധവ് താക്കറെയുടെ വസതിക്ക് മുന്പില് ഹനുമാന് ചാലിസ ചൊല്ലുമെന്ന് വെല്ലുവിളിച്ച നേതാവാണ് സ്വതന്ത്ര എംപിയായ നവ്നീത് കൗര് റാണ്. ഇതിന്റെ പേരില് നവനീത് കൗര് റാണയെയും ഭര്ത്താവ് രവി റാണ എംഎല്എയെയും ഉദ്ധവ് താക്കറെ പൊലീസിനെക്കൊണ്ട് അറസ്റ്റ് ചെയ്യിപ്പിച്ച് ജയിലിലടച്ചിരുന്നു.
പുനെയിലെ കത്രാജിലെ ബാലാജി ഏരിയയിലെ തനജി സാവന്ത് എംഎല്എയുടെ ഓഫീസാണ് ശിവസേന പ്രവര്ത്തകര് അടിച്ചു തകര്ത്ത്. തനജി സാവന്ത് ഇപ്പോള് അസമില് ഏക് നാഥ് ഷിന്ഡേയോടൊപ്പമാണ്. “തങ്ങളുടെ പാര്ട്ടി പ്രവര്ത്തകരാണ് തനജി സാവന്തിന്റെ ഓഫീസ് തകര്ത്തത്. ഉദ്ധവ് താക്കറെയെ കുഴപ്പത്തിലാക്കിയ എല്ലാ വിമത എംഎല്എമാരും ഇതേ രീതിയിലുള്ള പ്രതികരണം നേരിടേണ്ടി വരും”- വിമത എംഎല്എമാരെ ഭീഷണിപ്പെടുത്തിക്കൊണ്ട് ശിവസേന പൂനെ സിറ്റി മേധാവി സഞ്ജയ് മോര് പറഞ്ഞു.
