സേലം: സ്ത്രീധനമായി കാറും സ്വര്‍ണ്ണവും നല്‍കിയില്ല ഭാര്യയെ ക്രിക്കറ്റ് ബാറ്റ് കൊണ്ട് തലയ്‌ക്കടിച്ച് കൊലപ്പെടുത്തി ഭര്‍ത്താവ്.സംഭവത്തില്‍ സേലം റെഡ്ഡിപ്പെട്ടി സ്വദേശി പി.കീര്‍ത്തിരാജിനെ(31)നെ പോലീസ് അറസ്റ്റ് ചെയ്തു.ഞായറാഴ്‌ച്ച രാത്രിയാണ് സംഭവം നടന്നത്. കീര്‍ത്തിരാജിന്റെ ഭാര്യ ധനുശ്രീ(26)ആണ് കൊല്ലപ്പെട്ടത്.
ഇവരുടെ വിവാഹം കഴിഞ്ഞിട്ട് മൂന്ന് വര്‍ഷമായി.ഇവര്‍ക്കിടെയില്‍ സ്ത്രീധനത്തെചൊല്ലി തര്‍ക്കം പതിവായിരുന്നു.പത്ത്ദിവസം മുന്‍പ് ധനുശ്രീ ഭര്‍ത്താവുമായി പിണങ്ങി സ്വന്തം വീട്ടിലേക്ക് പോയി.ശനിയാഴ്‌ച്ച കീര്‍ത്തിരാജ് ധനുശ്രീയുടെ വീട്ടിലെത്തി പ്രശ്‌നം പരിഹരിച്ചതിന് ശേഷം കൂട്ടികൊണ്ടുവന്നു.ഞായറാഴ്‌ച്ച വീണ്ടും വഴക്ക് നടന്നു.തര്‍ക്കത്തിനിടെ കീര്‍ത്തിരാജ് ധനുശ്രീയെ ക്രിക്കറ്റ് ബാറ്റ് ഉപയോഗിച്ച് തലയ്‌ക്കടിച്ച് കൊലപ്പെടുത്തി.
കൊലയ്‌ക്ക് ശേഷം ആത്മഹത്യയാണെന്ന് വരുത്തിതീര്‍ക്കാന്‍ ധനുശ്രീയുടെ മൃതദേഹം ഇയാള്‍ കെട്ടിതൂക്കി.പിന്നീടിയാള്‍ ധനുശ്രീയുടെ ബന്ധുക്കളെ വിളിച്ച് ധനുശ്രീ ആത്മഹത്യ ചെയ്തതായി അറിയിച്ചു.വീട്ടിലെത്തി പരിശോധിച്ച ബന്ധുക്കള്‍ ധനുശ്രീയുടെ ശരീരത്തിലെ മുറിവുകള്‍ കണ്ട് സംശയം തോന്നി പോലീസില്‍ പരാതി നല്‍കി.അസ്വഭാവിക മരണത്തിന് കേസ് എടുത്ത് പോലീസ്, കീര്‍ത്തിരാജിനെ കസ്റ്റഡിയില്‍ എടുത്ത് ചോദ്യം ചെയ്തു.ചോദ്യം ചെയ്യലില്‍ ഇയാള്‍ കൊലക്കുറ്റം സമ്മതിച്ചു.തുടര്‍ന്ന് ഇയാളെ പോലീസ് അറസ്റ്റ് ചെയ്തു.
ഇവര്‍ അടുത്തിടെ പുതിയവീട്ടിലേക്ക് താമസം മാറിയിരുന്നു.ഇതിനിടെ കീര്‍ത്തിരാജ് കൂടുതല്‍ സ്വര്‍ണ്ണവും, കാറും ആവ്ശ്യപ്പെട്ടു.എന്നാല്‍ അവര്‍ അത് നല്‍കിയില്ല.ഇതേത്തുടര്‍ന്ന് വഴക്ക് പതിവായിരുന്നു.ധനുശ്രീ മരിച്ച ദിവസവും ഇതേപ്പറ്റിതര്‍ക്കം നടന്നു.ഇതിനിടെയാണ് കൊലനടന്നത് എന്ന് പോലീസ് പറയുന്നു.
