മലപ്പുറം : പൊതുജനങ്ങളെ ബുദ്ധിമുട്ടിക്കുന്ന വിധത്തിലുള്ള മുഖ്യമന്ത്രി പിണറായി വിജയന്റെ സുരക്ഷയ്‌ക്കെതിരെ മലപ്പുറത്ത് വന്‍ പ്രതിഷേധം. തവനൂര്‍ സെന്‍ട്രല്‍ ജയിലിന്റെ ഉദ്ഘാടനത്തിനായി മുഖ്യമന്ത്രി എത്തുന്നതിനോട് അനുബന്ധിച്ചാണ് വന്‍ പ്രതിഷേധം. കരിങ്കൊടിയും കറുത്ത ഷര്‍ട്ടുമായാണ് പ്രതിഷേധക്കാര്‍ എത്തിയിരിക്കുന്നത്. മുഖ്യമന്ത്രിയുടെ പരിപാടികള്‍ക്കായി അസാധാരണ നിയന്ത്രണങ്ങള്‍ ഏര്‍പ്പെടുത്തിയതിന് പിന്നാലെയാണ് ഇത്തരത്തില്‍ വ്യാപകമായി പ്രതിഷേധങ്ങള്‍ അരങ്ങേറുന്നത്.
തവനൂരിലെത്തിയ മുഖ്യമന്ത്രിക്കെതിരെ യൂത്ത് ലീഗും യൂത്ത് കോണ്‍ഗ്രസ്സും ചേര്‍ന്ന് പ്രതിഷേധിക്കുകയാണ്. മുഖ്യമന്ത്രി പങ്കെടുക്കുന്ന വേദിക്ക് ചുറ്റും പോലീസ് വളഞ്ഞിരിക്കുകയാണ്. ഇതിന് സമീപത്തായാണ് യൂത്ത് കോണ്‍ഗ്രസിന്റെ പ്രതിഷേധ മാര്‍ച്ച്. പ്രതിഷേധക്കാര്‍ വേദിയിലേക്ക് നീങ്ങാതിരിക്കുന്നതിനായി പോലീസ് ബാരിക്കേഡ് വെച്ച് തടയുകയും ഇത് സംഘര്‍ഷത്തിലേക്കും നീങ്ങി. ബാരിക്കേഡ് കടക്കാനുള്ള ശ്രമത്തിലേക്ക് നീങ്ങിയതോടെ ജല പീരങ്കിയും ഉപയോഗിച്ചു.
മലപ്പുറത്തും കോഴിക്കോടുമായി രണ്ട് പരിപാടികളിലാണ് ഇന്ന് മുഖ്യമന്ത്രി പങ്കെടുക്കുന്നത്. കോട്ടയത്തും കൊച്ചിയിലും അരങ്ങേറിയ മുഖ്യമന്ത്രിയുടെ സുരക്ഷ മലപ്പുറത്തും ആവര്‍ത്തിക്കുകയാണ്. കറുത്ത മാസ്‌കിനും മാധ്യമപ്രവര്‍ത്തകര്‍ക്കും ഉള്‍പ്പടെ ഇവിടെ നിയന്ത്രണങ്ങള്‍ ഏര്‍പ്പെടുത്തിയിരിക്കുകയാണ്.
മലപ്പുറത്ത് മുഖ്യമന്ത്രി പങ്കെടുക്കുന്ന രണ്ടു പരിപാടികളുടെ സുരക്ഷക്ക് 700 പോലീസുകാരെയാണ് വിന്യസിച്ചിരിക്കുന്നത്. എസ്പിക്ക് നേരിട്ടാണ് സുരക്ഷയുടെ മേല്‍നോട്ടം. മുഴുവന്‍ ഡിവൈഎസ്പിമാരും മുഖ്യമന്ത്രിയുടെ പരിപാടിക്ക് സുരക്ഷ ഒരുക്കും. 20 സിഐ മാര്‍ക്കാണ് ചുമതല നല്‍കിയിട്ടുള്ളത്. പൊന്നാനി കുറ്റിപ്പുറം റോഡ് 9 മണി മുതല്‍ അടച്ചിട്ടിരിക്കുകയാണ്. പൊതുജനങ്ങളോടെ ബദല്‍ റോഡ് ഉപയോഗിക്കാനാണ് നിര്‍ദേശം നല്‍കിയിരിക്കുന്നത്. ഒരു മണിക്കൂര്‍ മുമ്പേ പരിപാടി നടക്കുന്ന സ്ഥലത്ത് എത്താന്‍ മാധ്യമ പ്രവര്‍ത്തകര്‍ക്കും നിര്‍ദ്ദേശം നല്‍കിയിട്ടുണ്ട്. തവനൂരില്‍ കറുത്ത മാസ്‌ക് ധരിച്ചെത്തിയ പൊതു ജനങ്ങളുടെ മാസ്‌ക് അഴിപ്പിച്ചു. പകരം മറ്റ് നിറങ്ങളിലുള്ള മാസ്‌കുകള്‍ പോലീസ് നല്‍കി.
മുഖ്യമന്ത്രി വിശ്രമിക്കാനും ഭക്ഷണം കഴിക്കാനുമെത്തുന്ന കുറ്റിപ്പുറത്തെ കെടിഡിസി ഹോട്ടലിന് ചുറ്റും കനത്ത നിയന്ത്രണങ്ങളാണ്. സമീപത്തെ ഹോട്ടലുകള്‍ അടപ്പിച്ചു. കുറ്റിപ്പുറം- പൊന്നാനി റോഡും അടച്ചു. പൊതുജനങ്ങള്‍ ബദല്‍ റോഡിലൂടെ കടന്ന് പോകണമെന്നാണ് നിര്‍ദ്ദേശം. അതേസമയം മുഖ്യമന്ത്രിക്കെതിരെ പ്രതിഷേധത്തിന് സാധ്യതയുണ്ടെന്ന് മുന്നില്‍ കണ്ട് കുന്നംകുളത്തും ചങ്ങരംകുളത്തും യൂത്ത് കോണ്‍ഗ്രസ് പ്രവര്‍ത്തകരെ കരുതല്‍ തടങ്കലിലാക്കി. മലപ്പുറം ചങ്ങരംകുളത്ത് 5 യൂത്ത് കോണ്‍ഗ്രസ് പ്രവര്‍ത്തകരെയാണ് കരുതല്‍ തടങ്കലിലാക്കിയത്. മുഖ്യമന്ത്രിയുടെ വാഹനം കടന്ന് പോകുന്ന കുന്നംകുളത്തും യൂത്ത് കോണ്‍ഗ്രസ് പ്രവര്‍ത്തകരായ നാല് പേരെയാണ് കരുതല്‍ തടങ്കലിലാക്കി. യൂത്ത് കോണ്‍ഗ്രസ് ജില്ലാ എക്‌സിക്യൂട്ടീവ് അംഗം എ എം നിധിഷ്, കടങ്ങോട് മണ്ഡലം പ്രസിഡണ്ട് അസ് ലം, യൂത്ത് കോണ്‍ഗ്രസ് പ്രവര്‍ത്തകരായ രഞ്ചില്‍, വിഗ്‌നേശ്വര പ്രസാദ് എന്നിവരെ ഇന്ന് രാവിലെ വീടുകളിലെത്തിയാണ് പൊലീസ് കസ്റ്റഡിയിലെടുത്ത് കരുതല്‍ തടങ്കലിലാക്കിയത്. മുഖ്യമന്ത്രി പിണറായി വിജയന്റെ വാഹനത്തിന് കരിങ്കൊടി കാണിക്കാന്‍ സാധ്യതയുണ്ടെന്ന് കണ്ടാണ് ഈ അസാധാരണ സുരക്ഷ.
