ഇറങ്ങിയ സിനിമകള് പരാജയമായതോടെ തിയേറ്ററില് നിന്ന് ഒടിടിയിലേക്ക് പുതിയ പരീക്ഷണവുമായി കങ്കണ റണാവത്. തന്റെ ഇറങ്ങാനിരിക്കുന്ന സിനിമ ‘തേജസ്’ ഒടിടി റിലീസ് ആയിരിക്കുമെന്നാണ് പുറത്തുവരുന്ന റിപ്പോര്ട്ടുകള്. ബോളിവുഡ് പ്രതീക്ഷയോടെ കണ്ടിരുന്ന ധാക്കഡ് എന്ന സിനിമയുടെ ദയനീയ പരാജയമാണ് ഈ തീരുമാനത്തിന് പിന്നിലെന്നാണ് വിവരം. കങ്കണയുടെ തുടര്ച്ചയായി പരാജയപ്പെടുന്ന എട്ടാമത്തെ സിനിമ കൂടിയാണ് ധാക്കഡ്. 100 കോടി ബഡ്ജറ്റിലെത്തിയ സിനിമ ഇതുവരെ നേടിയത് മൂന്ന് കോടി മാത്രമാണ്.
ഇതിന് മുന്പ് റിലീസായ കാട്ടി ബാട്ടി, രന്ഗൂണ്, മണികര്ണിക, ജഡ്ജ്മെന്റല് ഹേ ക്യാ, പങ്ക, തലൈവി എന്നീ ചിത്രങ്ങള് ബോക്സോഫീസില് തകര്ന്നടിഞ്ഞിരുന്നു. കങ്കണയെ പ്രധാനകഥാപാത്രമാക്കി സിനിമയെടുക്കാന് നിന്നവരെല്ലാം പിന്മാറുന്നു എന്നും റിപ്പോര്ട്ടുകള് വന്നിരുന്നു. ഇപ്പോഴിതാ താരത്തിന്റെ ഏറ്റവും പുതിയ ചിത്രം തിയേറ്റര് റിലീസിന് പകരം ഒ.ടി.ടിയിലേക്ക് കൊടുക്കാന് ഒരുങ്ങുന്നുവെന്നാണ് വിവരങ്ങള്. ചിത്രത്തിലെ ചില ഭാഗങ്ങള് വീണ്ടും ഷൂട്ട് ചെയ്യാന് പോകുന്നുവെന്നും റിപ്പോര്ട്ടുകളുണ്ട്.
ധാക്കഡിന് പറ്റിയ പ്രശ്നങ്ങള് പുതിയ ചിത്രത്തെ ബാധിക്കാതിരിക്കാനാണ് ചില ഭാഗങ്ങള് വീണ്ടും ഷൂട്ട് ചെയ്യുന്നത്.ഇന്ത്യന് എയര്ഫോഴ്സിലെ ഫൈറ്റര് പൈലറ്റിന്റെ വേഷത്തിലാണ് കങ്കണ റണാവത്ത് തേജസില് എത്തുന്നത്. സര്വേഷ് മേവാരയാണ് ചിത്രത്തിന്റെ രചനയും സംവിധാനവും നിര്വ്വഹിച്ചിരിക്കുന്നത്. കങ്കണയെ കൂടാതെ അന്ഷുല് ചൗഹാന്, സങ്കല്പ് ഗുപ്ത, വരുണ് മിത്ര എന്നിവരും തേജസില് പ്രധാന വേഷങ്ങളില് എത്തുന്നുണ്ട്.
