തിരുവനന്തപുരം: കേരളത്തില്‍ കൊറോണയുടെ കണക്കുകള്‍ വ്യാപകമായി ഒളിപ്പിച്ചുവെച്ച് ജനത്തെ മരണത്തിലേക്ക് സര്‍ക്കാര്‍ തള്ളിവിട്ടുവെന്ന് വ്യക്തമാക്കുന്ന ഞെട്ടിക്കുന്ന കണക്കുകള്‍ പുറത്ത്. കൊറോണയുടെ കണക്കുകള്‍ വാര്‍ത്താക്കുറിപ്പിലൂടെ പ്രസിദ്ധപ്പെടുത്തുന്നത് അവസാനിപ്പിച്ചതിന് ശേഷം 12,94,551 പേര്‍ക്ക് രോഗം ബാധിച്ചുവെന്നും. 21,274 പേര്‍ മരിച്ചുവെന്നുള്ള ഞെട്ടിക്കുന്ന കണക്കുകളാണ് ഇപ്പോള്‍ പുറത്തുവന്നിരിക്കുന്നത്. കേരളത്തില്‍ ജനുവരി മുതല്‍ നാലു മാസത്തിനിടെ ഉണ്ടായ കോവിഡ് കേസുകളുടെ വിവരങ്ങളാണ് ഇപ്പോള്‍ പുറത്തുവന്നിരിക്കുന്നത്. പത്തനംതിട്ട കല്ലറക്കടവ് കാര്‍ത്തികയില്‍ മനോജിനു വിവരാവകാശ നിയമപ്രകാരം നല്‍കി അപേക്ഷയിലാണ് ആരോഗ്യവകുപ്പ് ഇക്കാര്യം തുറന്ന് പറഞ്ഞിരിക്കുന്നത്.
ജനുവരിയില്‍ 7,78,492 പേര്‍ക്കു കോവിഡ് ബാധിക്കുകയും 6601 പേര്‍ മരിക്കുകയും ചെയ്തു. ഫെബ്രുവരിയില്‍ 4,73,545 പേര്‍ രോഗികളായപ്പോള്‍ മരണസംഖ്യ 10,938 ആണ്. മാര്‍ച്ചില്‍ 33,469 രോഗികളും 2580 മരണവുമുണ്ടായി. ഏപ്രിലില്‍ രോഗികളുടെ എണ്ണവും മരണസംഖ്യയും കുത്തനെ കുറഞ്ഞു. 9045 രോഗികളും 1155 മരണവുമായിരുന്നു ഏപ്രിലിലേത്. 2020 ജനുവരി മുതല്‍ ഡിസംബര്‍ വരെ 7,60,933 രോഗികളും 3072 മരണവുമാണ് ഉണ്ടായിരുന്നത്. 2021ല്‍ ഇത് കുത്തനെ ഉയര്‍ന്നു. 44,86,244 രോഗികളും 44,722 മരണവും ഇക്കാലയളവില്‍ ഉണ്ടായി.
ഈ വര്‍ഷം ജനുവരിയില്‍ രോഗികളുടെ എണ്ണം കൂടിയെങ്കിലും മരണനിരക്കു കുറഞ്ഞു. ഫെബ്രുവരിയില്‍ രോഗികളുടെ എണ്ണം ജനുവരിയെ അപേക്ഷിച്ച് കുറഞ്ഞെങ്കിലും മരണസംഖ്യയില്‍ ഇരട്ടിയോളം വര്‍ധനയുണ്ടായെന്നാണ് വിവരവകാശ പ്രകാരം വ്യക്തമാകുന്നത്.
