കണ്ണൂര്‍: സിപിഎം പയ്യന്നൂര്‍ ഏരിയാ കമ്മറ്റിയിലുണ്ടായ ഫണ്ട് വെട്ടിപ്പ് സംബന്ധിച്ച ഒരു വിഭാഗത്തിന്റെ ആരോപണം ഗ്രൂപ്പ് പോരിന്റെ ഭാഗമെന്ന് വരുത്തി തീര്‍ക്കാന്‍ നീക്കം. പാര്‍ട്ടിയുടെ രക്തസാക്ഷി പട്ടികയില്‍ ഉള്‍പ്പെട്ട വ്യക്തിയുടെ കുടുംബത്തിന് നല്‍കാന്‍ പിരിച്ചെടുത്ത ഫണ്ടടക്കം തിരിമറി നടത്തിയതായുളള പരാതികളാണ് പാര്‍ട്ടിക്കുളളില്‍ ഉയര്‍ന്നത്. പ്രശ്‌നം ചര്‍ച്ച ചെയ്യാന്‍ സംസ്ഥാന സെക്രട്ടറി കോടിയേരി ബാലകൃഷ്ണന്റെ നേതൃത്വത്തില്‍ ഇന്നലെ വീണ്ടും ജില്ലാ കമ്മറ്റി യോഗം ചേര്‍ന്നെങ്കിലും ജില്ലാ കമ്മറ്റി മെമ്പര്‍മാര്‍ക്കിടയില്‍ വിഷയം സംബന്ധിച്ച് ഭിന്നാഭിപ്രായം നിലനില്‍ക്കുന്നതിനാല്‍ പ്രശ്‌നത്തിന് പരിഹാരം കാണാന്‍ കഴിഞ്ഞില്ല.
ജില്ലയില്‍ നിന്നുള്ള കേന്ദ്ര കമ്മറ്റി അംഗങ്ങള്‍ പങ്കെടുത്ത് കോടിയേരിയുടെ സാന്നിധ്യത്തില്‍ ജില്ലാ സെക്രട്ടേറിയേറ്റും ജില്ലാ കമ്മറ്റിയും ചേര്‍ന്ന് വിഷയം ചര്‍ച്ച ചെയ്തിരുന്നെങ്കിലും അന്തിമ തീരുമാനത്തിലെത്താന്‍ കഴിഞ്ഞിരുന്നില്ല. ഫണ്ട് തിരിമറിയുടെ തീവ്രത കുറച്ച് പാര്‍ട്ടിയുടെ മുഖം സംരക്ഷിക്കാനുള്ള ചര്‍ച്ചയാണ് കഴിഞ്ഞ ജില്ലാ കമ്മറ്റി യോഗത്തില്‍ ഉണ്ടായതെന്ന ആരോപണം പാര്‍ട്ടിക്കുളളില്‍തന്നെ ഉയര്‍ന്നിരുന്നു. ഇന്നലെ നടന്ന യോഗത്തില്‍ ജില്ലയില്‍ നിന്നുള്ള കേന്ദ്ര കമ്മറ്റി അംഗങ്ങളും പങ്കെടുത്തു. ആരോപണവിധേയരായ നേതാക്കള്‍ക്ക് ഉണ്ടായത് ജാഗ്രതക്കുറവാണെന്നും നേതാക്കളുടെ നിര്‍ദേശമനുസരിച്ച് പ്രവര്‍ത്തിച്ചവരുടേത് വീഴ്ചയാണെന്നും വിലയിരുത്തി പേരിനു നടപടിയെടുക്കാനായിരുന്നു ആദ്യഘട്ടം മുതല്‍ നേതാക്കളുടെ ആലോചന.
പാര്‍ട്ടി നിയോഗിച്ച അന്വേഷണ കമ്മിഷന്റെ കണ്ടെത്തലില്‍ കുറ്റക്കാരെന്ന് കണ്ടെത്തിയ എല്ലാവര്‍ക്കുമെതിരെ നടപടി വേണ്ടതില്ലെന്ന ജില്ലാ നേതൃത്വത്തിന്റെ നിലപാടില്‍ പയ്യന്നൂരിലെ പാര്‍ട്ടിക്കുളളില്‍ ഉടലെടുത്ത പ്രതിഷേധം ഇപ്പോഴും നിലനില്‍ക്കുകയാണ്. ഫണ്ട് തിരിമറി പാര്‍ട്ടിയുടെ ശ്രദ്ധയില്‍പ്പെടുത്തിയവരേയും അച്ചടക്ക നടപടിക്ക് വിധേയരാക്കണമെന്ന ഒരു വിഭാഗത്തിന്റെ ആവശ്യം നിലനില്‍ക്കുന്നതും പാര്‍ട്ടിക്ക് തലവേദനയായിരിക്കുകയാണ്. ആരോപണ വിധേയരായ നേതാക്കളെ സംരക്ഷിച്ച് ക്രമക്കേടുകളുടെ ഉത്തരവാദിത്തം പ്രാദേശിക പ്രവര്‍ത്തകരുടെ വീഴ്ചയായി കണ്ട് നടപടിയെടുക്കാനുളള നീക്കത്തിനെതിരേയും പാര്‍ട്ടിക്കുളളില്‍ പ്രതിഷേധം ഉയര്‍ന്നിട്ടുണ്ട്. മേഖലയിലെ പാര്‍ട്ടി അനുഭാവികള്‍ക്കിടയില്‍ പാര്‍ട്ടി നേതൃത്വത്തിന്റെ നടപടിയില്‍ അമര്‍ഷം ശക്തമായിട്ടുണ്ട്. ഇന്നലെ ചേര്‍ന്ന ജില്ലാ കമ്മറ്റി യോഗത്തിലും ഒരു വിഭാഗത്തിനെതിരെ മാത്രം നടപടിയെടുക്കാനുളള നീക്കത്തില്‍ നേതാക്കള്‍ക്കിടയില്‍ ഭിന്നതയുണ്ടായതായാണ് വിവരം.
2021ലെ നിയമസഭാ തെരഞ്ഞടുപ്പ് ഫണ്ട്, പയ്യന്നൂര്‍ ഏരിയാ കമ്മിറ്റി ഓഫീസ് കെട്ടിട നിര്‍മ്മാണ ഫണ്ട്, രക്തസാക്ഷി ഫണ്ട് എന്നിവയില്‍ തിരിമറി നടന്നതായാണ് ആരോപണം. ഏരിയാ കമ്മറ്റി ഓഫീസ് നിര്‍മ്മാണ ധനസമാഹരണത്തിനുവേണ്ടി സിപിഎം നടത്തിയ ചിട്ടിയില്‍ 80 ലക്ഷത്തോളം രൂപയുടെ തിരിമറി നടന്നതായും ഒരു നറുക്കിന് വേണ്ടി പിരിച്ചെടുത്ത തുക പൂര്‍ണമായി ചിട്ടിക്കണക്കില്‍പ്പെടുത്തിയില്ലെന്നുമാണ് ആരോപണം. 2 രസീത് ബുക്കുകളുടെ കൗണ്ടര്‍ ഫോയിലുകള്‍ തിരിച്ചെത്താതിരുന്നതോടെയാണ് തെരഞ്ഞെടുപ്പു ഫണ്ട് പിരിവിലെ തിരിമറി പുറത്ത് വന്നത്. രക്തസാക്ഷിക്ക് വേണ്ടി പിരിച്ച ഫണ്ടില്‍ ഒരു ഭാഗം മാത്രം കുടുംബത്തിന് നല്‍കി ലക്ഷക്കണക്കിന് രൂപ പാര്‍ട്ടി നേതാക്കളുടെ അക്കൗണ്ടില്‍ നിക്ഷേപിച്ച് തിരിമറി നടത്തിയെന്നതാണ് മറ്റൊരു പരാതി. ഫണ്ട് വെട്ടിപ്പുകളുമായി ബന്ധപ്പെട്ട പ്രശ്‌നങ്ങള്‍ പയ്യന്നൂര്‍ മേഖലയിലെ സിപിഎമ്മിലെ ഭിന്നത പൊട്ടിത്തെറിയിലേക്ക് നീങ്ങുകയാണ്.
