കൊല്ലം : വിസ്മയയുടേത് ആത്മഹത്യയാണ്. താന്‍ കുറ്റക്കാരനല്ലെന്ന് പ്രതി കിരണ്‍ കുമാര്‍. വിധി പ്രസ്താവനയ്‌ക്കായി കോടതിയില്‍ എത്തിയ കിരണ്‍ കോടതിയില്‍ അറിയിച്ചതാണ് ഇക്കാര്യം. രാവിലെ കേസ് പരിഗണിച്ചപ്പോള്‍ കിരണ്‍ കുമാറിനോട് കോടതി എന്തെങ്കിലും പറയാനുണ്ടോയെന്ന് ചോദിച്ചിരുന്നു. തുടര്‍ന്ന് തനിക്കെതിരായ ആരോപണങ്ങള്‍ തെറ്റാണെന്നും കിരണ്‍ പറഞ്ഞു.
വിസ്മയയുടേത് ആത്മഹത്യയാണ്. താന്‍ കുറ്റം ചെയ്തിട്ടില്ല. തന്റെ പിതാവിന് ഓര്‍മ്മ കുറവുണ്ട്. അമ്മയ്‌ക്കും വാതരോഗ സംബന്ധമായ പ്രശ്‌നങ്ങളുണ്ട്. ഇരുവരേയും സംരക്ഷിക്കേണ്ടത് താനാണ്. പ്രായം പരിഗണിച്ച് ശിക്ഷയില്‍ ഇളവ് നല്‍കണമെന്നും കിരണ്‍ കുമാര്‍ കോടതിയില്‍ അറിയിച്ചു. എന്നാല്‍ കേസിലെ വിധി പ്രസ്താവന സമൂഹത്തിന് പാഠമാകണമെന്ന് പ്രോസിക്യൂഷന്‍ കോടതിയില്‍ പറഞ്ഞു. സര്‍ക്കാര്‍ ഉദ്യോഗസ്ഥന്‍ സ്ത്രീധനം വാങ്ങരുതെന്ന് ചട്ടമുണ്ട്. പ്രതി സ്ത്രീധനം ആവശ്യപ്പെട്ടിട്ടുണ്ട്. പ്രതിയോട് കോടതി അനുകമ്പ കാട്ടേണ്ടതില്ല. പരമാവധി ശിക്ഷ നല്‍കണമെന്നും പ്രോസിക്യൂഷന്‍ കോടതിയില്‍ ആവശ്യപ്പെട്ടു.
കേസില്‍ കുറ്റക്കാരനെന്ന് തിങ്കളാഴ്ച കേസ് പരിഗണിച്ച കൊല്ലം ജില്ലാ അഡീഷണല്‍ സെഷന്‍സ് കോടതി ഉത്തരവിറക്കിയിരുന്നു. തുടര്‍ന്ന് ചൊവ്വാഴ്ച വിധി പ്രസ്താവനയ്‌ക്കായി മാറ്റിവെയ്‌ക്കുകയായിരുന്നു. ഗാര്‍ഹിക പീഡനം, ആത്മഹത്യാ പേരണ എന്നീ കുറ്റങ്ങള്‍ ചുമത്തിയാണ് കിരണ്‍ കുമാറിന് ജീവപര്യന്തം ശിക്ഷ വിധിച്ചിരിക്കുന്നത്.
വിസ്മയ മരിച്ച് ഒരു വര്‍ഷം പൂര്‍ത്തിയാകും മുമ്പാണ് കേസില്‍ വിധി പ്ര്താവന നടത്തുന്നത്. സമൂഹ മനസാക്ഷിയെ തൊട്ടുണര്‍ത്തിയ കേസില്‍ അതിവേഗത്തിലായിരുന്നു കോടതി നടപടികള്‍. ഏഴു വര്‍ഷം മുതല്‍ ജീവപര്യന്തം തടവുശിക്ഷ വരെ ലഭിക്കാവുന്ന കുറ്റങ്ങള്‍ കിരണ്‍ ചെയ്തിട്ടുണ്ടെന്ന് കോടതി വിധി പ്രസ്താവനയ്‌ക്കിടെ അറിയിച്ചു.
തിങ്കളാഴ്ച കേസ് പരിഗണിച്ച കോടതി സ്ത്രീധന പീഡനവും ആത്മഹത്യ പ്രേരണയും ഉള്‍പ്പെടെ വിസ്മയയുടെ ഭര്‍ത്താവ് കിരണിനെതിരെ ചുമത്തിയ പ്രധാന കുറ്റങ്ങളെല്ലാം നില നില്‍ക്കുന്നതാണെന്നും കൊല്ലം ജില്ലാ അഡീഷണല്‍ സെഷന്‍സ് കോടതി തിങ്കളാഴ്ച ഉത്തരവിറക്കിയിരിക്കുന്നു. കിരണ്‍ കുമാറിനെതിരെ പോലീസ് ചുമത്തിയ ഏഴ് കുറ്റങ്ങളില്‍ അഞ്ചും നിലനില്‍ക്കുമെന്ന് കോടതി പറഞ്ഞിരുന്നു. ഐപിസി 304 (ബി), ഗാര്‍ഹിക പീഡനത്തിനെതിരായ 498 (എ), ആത്മഹത്യാ പ്രേരണയ്‌ക്കെതിരായ ഐപിസി 306 വകുപ്പുകളും സ്ത്രീധന നിരോധന നിയമത്തിലെ 3, 4 വകുപ്പുകളും ശരിവെച്ച കോടതി ഐപിസി 506, 323 വകുപ്പുകള്‍ തള്ളിക്കളഞ്ഞിരുന്നു. കുറ്റക്കാരനെന്ന് കണ്ടെത്തിയതോടെ കിരണ്‍ കുമാറിന്റെ ജാമ്യം കോടതി റദ്ദാക്കിയിരുന്നു. തുടര്‍ന്ന് ഇയാളെ ഇന്നലെ തന്നെ ജയിലിലേക്ക് മാറ്റി. രാവിലെ വിധി പ്രസ്താവനയ്‌ക്കായി പോലീസ് കോടതിയില്‍ എത്തിക്കുകയായിരുന്നു.
2021 ജൂണ്‍ 21 നാണ് ബിഎഎംഎസ് വിദ്യാര്‍ത്ഥിനി വിസ്മയയെ ഭര്‍തൃവീട്ടില്‍ മരിച്ച നിലയില്‍ കണ്ടെത്തിയത്. 42 സാക്ഷികളെയാണ് കേസില്‍ വിസ്തരിച്ചത്. 120 രേഖകളും 12 തൊണ്ടിമുതലുകളും കൂടി പരിശോധിച്ച ശേഷമാണ് കൊല്ലം അഡീഷണല്‍ സെഷന്‍സ് കോടതി ജഡ്ജി കെ എന്‍ സുജിത് കേസില്‍ ഇന്നലെ വിധി പറഞ്ഞത്. കേസ് കെട്ടിച്ചമച്ചതാണെന്നും സ്വന്തം അച്ഛനുമായുണ്ടായ പ്രശ്‌നങ്ങളുടെ പേരിലാണ് വിസ്മയ ആത്മഹത്യ ചെയ്തത് എന്നും സമര്‍ത്ഥിക്കാനാണ് പ്രതിഭാഗം കോടതിയില്‍ ശ്രമിച്ചത്. ഭര്‍തൃവീട്ടില്‍ താന്‍ നേരിടുന്ന പീഡനങ്ങളെ കുറിച്ചുള്ള വിസ്മയയുടെ ശബ്ദ സംഭാഷണം ഇതിനിടെ പുറത്തുവന്നു. അച്ഛന്‍ ത്രിവിക്രമന്‍ നായരുമായി നടത്തിയ ഫോണ്‍ സംഭാഷണം കോടതിയില്‍ സുപ്രധാന തെളിവായി പ്രോസിക്യൂഷന്‍ സമര്‍പ്പിച്ചിരുന്നു.
