ന്യൂദല്‍ഹി: പ്രധാനമന്ത്രി നരേന്ദ്രമോദിയെ പ്രശംസിച്ച് തെന്നിന്ത്യന്‍ നടന്‍ മാധവന്‍. ഒന്നാം മോദി സര്‍ക്കാരിന്റെ ആരംഭകാലത്ത് കൊണ്ടുവന്ന് വിജയിപ്പിച്ച ഡിബിടി പദ്ധതി ചൂണ്ടിക്കാട്ടിയായിരുന്നു മാധവന്റെ പരാമര്‍ശം. ഇന്ന് കര്‍ഷകര്‍ക്ക് സബ്‌സിഡികള്‍ നേരിട്ട് അവരുടെ ബാങ്ക് അക്കൗണ്ടില്‍ എത്തുന്നു. എതിര്‍പ്പുകള്‍ ഉയര്‍ന്നിട്ടും പദ്ധതിയുമായി മുന്നോട്ടുപോയ പ്രധാനമന്ത്രിയുടെ വിജയമണിതെന്ന് മാധവന്‍ പറഞ്ഞു.
ഫോണ്‍പോലും ഉപയോഗിക്കാന്‍ അറിയില്ലാത്ത സാധാരണക്കാര്‍ക്ക് എങ്ങനെ ബാങ്ക് അക്കൗണ്ട് നിയന്ത്രിക്കാന്‍ സാധിക്കുമെന്ന് പലരും ആശങ്കപ്പെട്ടിരുന്നു. എന്നാല്‍ ആശങ്കകള്‍ അസ്ഥാനത്താക്കി പദ്ധതി വിജയിച്ചിരിക്കുന്നു. ഇന്ന് കര്‍ഷകര്‍ക്ക് സബ്‌സിഡികള്‍ നേരിട്ട് അവരുടെ ബാങ്ക് അക്കൗണ്ടുകള്‍ വഴി സ്വീകരിക്കുന്നു. പദ്ധതിയുടെ വിജയത്തിന് വേണ്ടി ആര്‍ക്കും കര്‍ഷകരെ പ്രത്യേകമായി സ്മാര്‍ട്‌ഫോണ്‍ ഉപയോഗിക്കുന്ന രീതികള്‍ പഠിപ്പിക്കേണ്ടി വന്നില്ല. മാറുന്ന ഇന്ത്യയുടെ വിജയമാണ് ഇത് ചൂണ്ടിക്കാട്ടുന്നതെന്നും മാധവന്‍ പറഞ്ഞു.
ഒന്നാം മോദി സര്‍ക്കാര്‍ ഡിജിറ്റല്‍ പണമിടപാടുകളെ പ്രോത്സാഹിപ്പിക്കുന്ന നിരവധി പദ്ധതികള്‍ നടപ്പാക്കിയിരുന്നു. എന്നാല്‍ ഇതൊന്നും നടക്കാന്‍ പോകുന്നില്ലെന്ന മുറവിളിയായിരുന്നു നാലുപാടും ഉയര്‍ന്നു കേട്ടിരുന്നു. എന്നാല്‍ പദ്ധതികള്‍ ഫലപ്രദമായി നടപ്പിലാക്കാന്‍ സാധിച്ചുവെന്നും മാധവന്‍ ചൂണ്ടിക്കാട്ടി.
കാന്‍സ് ചലച്ചിത്രവേദിയിലായിരുന്നു മാധവന്റെ അഭിപ്രായ പ്രകടനം. കേന്ദ്ര മന്ത്രി അനുരാഗ് താക്കൂറാണ് വീഡിയോ ട്വിറ്ററില്‍ പങ്കുവെച്ചിരിക്കുന്നത്.
