കൊച്ചി: മാതൃഭൂമി ഡപ്യൂട്ടി ന്യൂസ് എഡിറ്റര്‍ അഭിലാഷ് മോഹനന്റെ ഭാര്യയെ കൊച്ചി ശാസ്ത്ര സാങ്കേതിക സര്‍വ്വകലാശാലയില്‍ നിയമിക്കാനായി നടത്തിയത് അടിമുടി വഴിവിട്ട നീക്കങ്ങള്‍. മത്സരപരീക്ഷ ചട്ടങ്ങള്‍ വരെ കാറ്റില്‍ പറത്തിയാണ് അഭിലാഷിന്റെ ഭാര്യ വന്ദന മോഹനന്‍ ദാസിനെ കുസാറ്റില്‍ തിരുകി കയറ്റിയത്.
സിപിഎമ്മിനെ ന്യായീകരിക്കുന്നതില്‍ മുന്‍പന്തിയില്‍ നില്‍ക്കുന്ന മാധ്യമ പ്രവര്‍ത്തകനാണ് അഭിലാഷ്. പാര്‍ട്ടിയെ ന്യായീകരിച്ച് വെളിപ്പിച്ചതിനുള്ള സമ്മാനമാണ് ഭാര്യയ്‌ക്ക് കുസാറ്റില്‍ നല്‍കിയ പിന്‍വാതില്‍ നിയമനമെന്ന് ആരോപണമുയര്‍ന്നിരുന്നു. ജന്മഭൂമിയാണ് ഈ വാര്‍ത്ത ആദ്യം പുറത്തുവിട്ടത്. തുടര്‍ന്ന് വാര്‍ത്ത വ്യാജം ആണെന്നും സത്യമാണെന്ന് തെളിയിച്ചാല്‍ മാധ്യമപ്രവര്‍ത്തനം നിര്‍ത്തി ജന്മഭൂമി പറയുന്ന ജോലി ചെയ്യാമെന്നും അഭിലാഷ് വെല്ലുവിളിച്ചിരുന്നു.
എന്നാല്‍, അഭിലാഷ് വെല്ലുവിളി ഏറ്റെടുക്കാന്‍ തയാറായാല്‍ മാധ്യമപ്രവര്‍ത്തനം നിര്‍ത്തേണ്ട തെളിവുകളാണ് വെളിയില്‍ വന്നിരിക്കുന്നത്. വന്ദന മോഹനന്‍ ദാസിനെ കുസാറ്റില്‍ പി ആര്‍ ഒ ആയി നിയമിച്ച നടപടികളില്‍ ഒരു സുതാര്യതയില്ലെന്നുള്ള രേഖകള്‍ പുറത്തുവന്നുകഴിഞ്ഞു.
2020മെയ് മാസത്തിലാണ് കൊച്ചി ശാസ്ത്ര സാങ്കേതിക സര്‍വകലാശാലയിലെ പി ആര്‍ ആന്‍ഡ് പി ഡയറക്ടര്‍ എന്ന ഒരു തസ്തികയിലേക്ക് അപേക്ഷ ക്ഷണിക്കുന്നത്. ഇതില്‍ അഭിമുഖം നടത്തി സര്‍വകലാശാല റാങ്ക് പട്ടിക പ്രസിദ്ധീകരിച്ചു. ഒരു വര്‍ഷത്തേക്ക് കരാര്‍ നിയമനം എന്ന തരത്തിലായിരുന്നു ഈ നടപടിക്രമങ്ങള്‍. അങ്ങനെ 2020ല്‍ നടപടി ക്രമങ്ങള്‍ പൂര്‍ത്തിയാക്കി കുസാറ്റ് പരീക്ഷയിലും അഭിമുഖത്തിലും ഒന്നാമത് വന്ന മാധ്യമ പ്രവര്‍ത്തകനായ കെ രാജഗോപാലിനെ പിആര്‍ഒയായി നിയമിച്ചു. ഇതോടെ ആ തസ്തികയ്‌ക്കായി ഉണ്ടാക്കിയ റാങ്ക് ലിസ്റ്റ് അസാധുവായിരുന്നു.
പിഎസ്‌സി വഴി ആരെങ്കിലും നിയമിക്കപ്പെട്ടാല്‍ ജോലി നഷ്ടമാകുമെന്നും മൂന്നു വര്‍ഷത്തേക്ക് തുടര്‍ച്ചയായി കരാര്‍ പുതുക്കാമെന്ന വ്യവസ്ഥയും ഒപ്പിട്ടാണ് രാജഗോപാലിനെ ജോലിക്ക് നിയമിക്കുന്നത്.
ഒരു കൊല്ലം പൂര്‍ത്തിയായപ്പോള്‍ രാജഗോപാലിനെ ഒരു മുന്നറിയിപ്പും കൂടാതെ പിരിച്ച് വിടുകയായിരുന്നു. പി.എസ്.സി വഴിയുള്ള നിയമനം വന്നതിനാലാണ് തന്നെ പിരിച്ചുവിടുന്നതെന്നാണ് അദേഹം കരുതിയത്. തുടര്‍ന്ന് അദേഹം സ്വയം പിരിഞ്ഞ് പോകുകയും ചെയ്തിരുന്നു. എന്നാല്‍, പഴയ റാങ്കു ലിസ്റ്റിലെ രണ്ടാം സ്ഥാനക്കാരിയായ അഭിലാഷിന്റെ ഭാര്യയെ ഈ പോസ്റ്റില്‍ നിയമിച്ചതോടെയാണ് രാജഗോപാലിന് ചതി മനസിലായത്.
ആദ്യ റാങ്കുകാരനായ തന്നെ നിയമിച്ചതിലൂടെ പഴയ റാങ്ക് ലിസ്റ്റ് പോലും അപ്രസക്തമായി. പുതിയ നിയമനത്തിന് വീണ്ടും നടപടിക്രമങ്ങള്‍ തുടങ്ങണം. പുതിയ ആപ്ലിക്കേഷന്‍ വിളിച്ച് അഭിമുഖം നടത്തി റാങ്ക് പട്ടിക തയാറാക്കി നിയമനം നടത്തണം. എന്നാല്‍, ഈ ചട്ടങ്ങള്‍ ഒന്നു നടത്താതെയാണ് അഭിലാഷിന്റെ ഭാര്യയെ പിന്‍വാതിലിലൂടെ തിരുകി കയറ്റിയത്.
