ഇടുക്കി : പാര്ട്ടി പ്രവര്ത്തകയോട് ലോക്കല് കമ്മിറ്റി സെക്രട്ടറി അശ്ലീല ചുവയോടെ സംസാരിക്കുകയും അപമര്യാദയായി പെരുമാറിയതായും പരാതി. സിപിഎം ശാന്തന്പാറ ഏരിയ കമ്മിറ്റിയുടെ പരിധിയിലെ പാറത്തോട് ലോക്കല് കമ്മറ്റി സെക്രട്ടറി ജിജി വര്ഗീസിനെതിരായാണ് ആരോപണം.
പാര്ട്ടി പ്രവര്ത്തകയായ തോട്ടം തൊഴിലാളിയോട് ലോക്കല് സെക്രട്ടറി മോശമായി പെരുമാറിയെന്നും ഫോണിലൂടെ മോശമായി സംസാരിച്ചെന്നും ചൂണ്ടികാട്ടി ഭര്ത്താവാണ് ശാന്തന്പാറ ഏരിയാ കമ്മിറ്റിക്ക് പരാതി നല്കിയത്. ലോക്കല് കമ്മിറ്റി സെക്രട്ടറി ഈ സ്ത്രീയുമായി നടത്തിയ ഫോണ് സംഭാഷണം ഭര്ത്താവ് റെക്കോഡ് ചെയ്ത് പാര്ട്ടിക്ക് നല്കിയ പരാതിക്കൊപ്പം കൈമാറിയിട്ടുണ്ട്.
ലോക്കല് കമ്മിറ്റിയില് കഴിഞ്ഞ സമ്മേളനത്തില് മത്സരത്തിലൂടെയാണ് ഇയാള് സെക്രട്ടറിയായത്. സംഭവം വവാദമായതോടെ ജിജിയെ ലോക്കല് കമ്മിറ്റി സെക്രട്ടറി സ്ഥാനത്തു നിന്നും പാര്ട്ടി നീക്കി. ഇതോടെ വിവാദങ്ങള് ഒതുക്കി തീര്ക്കാനാണ് പാര്ട്ടിയുടെ ശ്രമം.
അതേസമയം ഫോണ് സംഭാഷണത്തില് ലൈംഗികച്ചുവയുള്ള പരാമര്ശങ്ങളില്ലെന്നും ലോക്കല് സെക്രട്ടറി സ്ഥാനത്തേക്കുള്ള മത്സരത്തില് പരാജയപ്പെട്ട ഒരു വിഭാഗം മനഃപൂര്വം വിവാദം സൃഷ്ടിച്ചതാണ് പ്രശ്നങ്ങള്ക്ക് കാരണമെന്നുമാണ് ജിജിയോട് അടുത്ത വൃത്തങ്ങള് മറുപടി നല്കിയത്.
