കൊരട്ടി: മനോദൗര്‍ബല്യമുളള ആള്‍ നിര്‍ത്തിയിട്ടിരുന്നു ട്രക്കുമായി പാഞ്ഞത് 27 കിലോമീറ്റര്‍. മധ്യപ്രദേശ് സ്വദേശിയാണ് അപകടമാം വിധം ട്രക്ക് ഓടിച്ചത്.ഇത് മൂലം റോഡില്‍ പല വിധ പ്രശ്‌നങ്ങള്‍ ഉണ്ടാവുകയും, ആളുകള്‍ ട്രക്ക് തടഞ്ഞു നിര്‍ത്തുകയും ചെയ്തു.
ആളുകള്‍ ബഹളം വെയ്‌ക്കുന്നത് കേട്ടാണ് ട്രക്കില്‍ ഉറങ്ങിക്കിടന്ന മറ്റൊരു ഡ്രൈവര്‍ വിവരം അറിഞ്ഞത്. മണ്ണൂത്തി- നെടുമ്പാശ്ശേരി നാലുവരിപാതയില്‍ ഇന്നലെ പുലര്‍ച്ചെ നാലരയ്‌ക്കാണ് സംഭവം. കര്‍ണ്ണാടകയില്‍ നിന്ന് ഫര്‍ണ്ണീച്ചറുകളുമായി വരുന്ന ട്രക്കാണ് ഇയാള്‍ എടുത്തുകൊണ്ടുപോയത്. ഈ സമയം ട്രക്ക് ഡ്രൈവര്‍ പാലിയേക്കര ടോള്‍ പ്ലാസയില്‍ വണ്ടി നിര്‍ത്തി ശുചിമുറിയില്‍ പോയിരിക്കുകയായിരുന്നു. താക്കോല്‍ എടുത്തിരുന്നില്ല. ഉടന്‍ ഇയാള്‍ വാഹനത്തില്‍ കയറി ഓടിക്കാന്‍ തുടങ്ങി.പുലര്‍ച്ചെ ആയിരുന്നതിനാല്‍ തിരക്കുണ്ടായിരുന്നില്ല.
കൊടകര വരെ സാധാരണ പോലെ വാഹനം ഓടിച്ച ഇയാള്‍ പിന്നീട് വാഹനം വെട്ടിച്ച് ഭീകരാന്തരീക്ഷം ഉണ്ടാക്കി. മരിങ്ങൂര്‍ ജംഗ്ഷനില്‍ വെച്ച് ടൂറിസ്റ്റ് ബസ്സിന് സൈഡ് കൊടുക്കാതെ മുന്നോട്ട് പോയി. റോഡില്‍ തടസ്സം സൃഷ്ടിച്ചതിനാല്‍ ബസ്സ് ഡ്രൈവര്‍ പോലീസില്‍ അറിയിച്ചു.പൊങ്ങത്തു വച്ച് ബസ്സ് കുറുകെയിട്ടാണ് ട്രക്ക് തടഞ്ഞത്. ബഹളം കേട്ട് കാബിനില്‍ ഉറങ്ങുകയായിരുന്ന കോതമംഗലം സ്വദേശിയായ ഡ്രൈവര്‍ ഉണരുകയും പരിചയമില്ലാത്ത ആളെ ഡ്രൈവിങ്ങ് സീറ്റില്‍ കണ്ട് പരിഭ്രമിക്കുകയും ചെയ്തു.
എന്നാല്‍ ശുചിമുറിയില്‍ പോയ ഡ്രൈവര്‍ ഫോണ്‍ എടുക്കാത്തതിനാല്‍ വിവരം അറിയിക്കാനും സാധിച്ചില്ല.ലോറി പോലീസ് കസ്റ്റഡിയില്‍ എടുത്തു.ലോറി ഡ്രൈവര്‍ക്ക് കേസ് ഇല്ലാത്തതിനാല്‍ പോലീസ് ഇയാളെ കോടതിയിൽ എത്തിച്ച് വിട്ടയച്ചു. ഇയാള്‍ മുന്‍പ് ട്രക്ക് ഡ്രൈവര്‍ ആയിരുന്നതായി പോലീസ് പറയുന്നു.
