തൃശൂര് : ട്രേഡ് യൂണിയന് പ്രഖ്യാപിച്ച ദേശീയ പണിമുടക്കില് സിപിഎം ഭരിക്കുന്ന സഹകരണ ബാങ്കില് ജീവനക്കാര് ഷട്ടര് അടച്ചിട്ടിരുന്ന് ജോലി ചെയ്യുന്നു. തൃശൂര് സര്വീസ് സഹകരണ ബാങ്കിലാണ് ജീവനക്കാര് ജോലിക്ക് കയറിയത്. പണിമുടക്കിന് ആഹ്വാനം ചെയ്യുന്ന സിപിഎം തൊഴിലാളി യൂണിയനില് പെട്ട ജീവനക്കാരാണ് ജോലിക്കെത്തിയതെന്ന് ബിജെപി ആരോപിച്ചു.
കേരളത്തിലെ മുഴുവന് ജനങ്ങള്ക്കും പണിമുടക്കിന് ആഹ്വാനം ചെയ്തിട്ട് സിപിഎം ഭരിക്കുന്ന ബാങ്ക് പ്രവര്ത്തിക്കുകയാണ്. തിങ്കളാഴ്ച രാവിലെ മുതല് ഇവിടെ ജീവനക്കാരെത്തി പ്രവര്ത്തിക്കുന്നുണ്ട്. സിപിഎമ്മിന്റെ ഈ പൊള്ളത്തരം ജനങ്ങള് തിരിച്ചറിയണം. മറ്റുള്ളവരെ ബലം പ്രയോഗിച്ച് തൊഴിലെടുക്കുന്നതില് നിന്ന് പിന്തിരിപ്പിച്ചിട്ട്, സിപിഎമ്മിന്റെ തൊഴിലാളികളെല്ലാം ബാങ്കില് തൊഴിലെടുക്കുകയാണെന്നും ബിജെപി ജില്ലാ പ്രസിഡന്റ് അഡ്വ.കെ.കെ.അനീഷ്കുമാര് ആരോപിച്ചു.
അതേസമയം ബാങ്കിന് പണിമുടക്കിനോട് അനുകൂല നിലപാടാണ്. ട്രാന്സാക്ഷന് ഉള്പ്പെടെ ഇടപാടുകള് ഒന്നും നടക്കുന്നില്ല. പകരം സെര്വര് തകരാര് പരിഹരിക്കുന്നതിനുള്ള കമ്പ്യൂട്ടര് വിദഗ്ധരാണ് എത്തിയിരിക്കുന്നതെന്ന് ബാങ്ക് ഭരണസമിതി അറിയിച്ചു.
