തിരുവനന്തപുരം: സില്വര്ലൈന് വിരുദ്ധ സമരത്തോട് മുഖ്യമന്ത്രിക്ക് ഭീഷണിയുടെ സ്വരമാണെന്ന് ബിജെപി സംസ്ഥാന അദ്ധ്യക്ഷന് കെ.സുരേന്ദ്രന്. അത് നല്ലതല്ലെന്നും ശബരിമലയിലെ അനുഭവം സര്ക്കാരിന് സില്വര്ലൈന് സമരത്തിലും നേരിടേണ്ടിവരുമെന്നും തിരുവനന്തപുരത്ത് മാദ്ധ്യമങ്ങളോട് സംസാരിക്കവെ അദ്ദേഹം പറഞ്ഞു. സമരത്തെ പൊളിക്കാന് വിഭാഗീയതയുണ്ടാക്കാനാണ് സര്ക്കാര് ശ്രമം. ആസൂത്രിതമായ നീക്കമാണ് ഇതിനായി സര്ക്കാര് നടത്തുന്നത്. ഈ സമരം ജാതിമതരാഷ്ട്രീയത്തിന് ഉപരി ജനങ്ങളുടെ സമരമാണ്. ജാതിയും മതവും പറഞ്ഞ് ജനങ്ങലെ ഭിന്നിപ്പിക്കാനുള്ള സര്ക്കാരിന്റെ പിന്തിരിപ്പന് നിലപാട് വിലപ്പോവില്ല. മുസ്ലിംങ്ങളും ക്രിസ്ത്യാനികളും ബിജെപിക്കൊപ്പം രംഗത്ത് വരുന്നതിന്റെ കെറുവാണ് സര്ക്കാരിന്. മുഖം നഷ്ടപ്പെട്ട സര്ക്കാര് ജനങ്ങളുടെ കണ്ണില്പ്പൊടിയിടുകയാണ്. സില്വര്ലൈനിന് കേന്ദ്രാനുമതി ലഭിക്കുമെന്ന് പറയുന്നത് വ്യാജപ്രചരണം മാത്രമാണ്. മന്ത്രി സജി ചെറിയാന് പറയുന്നത് ബഫര് സോണ് ഇല്ലെന്നും കെറെയില് എംഡി പറയുന്നത് ഉണ്ടെന്നുമാണ്. സര്ക്കാര് ജനങ്ങളില് നിന്നും പലതും മറച്ചുവെക്കുകയാണ്.
ജനതാത്പര്യത്തിനാണ് ബിജെപി പ്രാധാന്യം നല്കുന്നത്. ജനങ്ങളോടൊപ്പം പാര്ട്ടി ഉറച്ച് നില്ക്കും. ശശി തരൂര് ഇടതുപക്ഷത്തേക്ക് ചാടാന് തയ്യാറായി നില്ക്കുകയാണ്. അതുകൊണ്ടാണ് അദ്ദേഹത്തെ സിപിഎം പാര്ട്ടി സമ്മേളനത്തിലെ സെമിനാറിന് ക്ഷണിച്ചത്. തിരുവനന്തപുരത്ത് കോണ്ഗ്രസ് സ്ഥാനാര്ത്ഥിയായി ജയിക്കാനാവില്ലെന്ന് തരൂരിന് മനസിലായി കഴിഞ്ഞുവെന്നും സുരേന്ദ്രന് പറഞ്ഞു.
