തിരുവനന്തപുരം: കിളിമാനൂരില് ബൈക്ക് അപകടത്തില് വ്യാപാരി മരണപ്പെട്ട സംഭവത്തിൽ ദുരൂഹത. ശരീരത്തില് വെട്ടേറ്റെന്ന് സംശയിക്കുന്ന പാടുകളുണ്ടെന്നാണ് ഡോക്ടര്മാരുടെ റിപ്പോര്ട്ട്. അതേസമയം അപകടം സംഭവിച്ചതിന് തൊട്ടുപിന്നാലെ ഒരു സംഘം വാഹനത്തില് സ്ഥലത്ത് എത്തിയതിന്റെ സിസിടിവി ദ്യശ്യങ്ങളും മരണത്തിൽ ദുരൂഹത ഉയർത്തുന്നു.
കല്ലറ ചെറുവാളം സ്വദേശി മണികണ്ഠനെയാണ്(44) മരിച്ച നിലയില് കണ്ടെത്തിയത്. സുഹൃത്തിനെ കൊണ്ടാക്കിയ ശേഷം വണ്ടിയെടുത്ത് മുന്നോട്ട് പോകവെയായിരുന്നു അപകടം നടന്നത്. സംഭവസ്ഥലത്തിനടുത്തുള്ള വീട്ടിലെ സിസിടിവി ദ്യശ്യങ്ങളിലാണ് ഈ സംഘം വാഹനത്തില് എത്തിയ ദൃശ്യങ്ങള് പതിഞ്ഞത്. ഇതാണ് പ്രധാനമായും മണികണ്ഠന്റെ മരണത്തില് ദുരൂഹത ഉയര്ത്തുന്നത്.
പോസ്റ്റ്മോര്ട്ടം റിപ്പോര്ട്ട് ലഭിച്ചാലേ കൂടുതല് നിഗമനത്തിലേയ്ക്ക് പോലീസിന് എത്തിച്ചേരാനാകു.
