കോഴിക്കോട്: തുടര് ഭരണം എന്നത് എന്തും ചെയ്യാനുള്ള ലൈസന്സാണെന്ന് മുഖ്യമന്ത്രി പിണറായി വിജയന് കരുതരുതെന്ന് ബിജെപി സംസ്ഥാന അദ്ധ്യക്ഷന് കെ.സുരേന്ദ്രന്. സ്വകാര്യവ്യക്തികളുടെ സ്ഥലത്തേക്ക് അതിക്രമിച്ച് കയറി കെ റെയില് സര്വ്വെകല്ല് സ്ഥാപിക്കാന് കേരളം ഉത്തര കൊറിയ അല്ലെന്ന് മാര്കിസ്റ്റ് സര്ക്കാര് മനസിലാക്കണം. കല്ലായിയിലും മാടപ്പള്ളിയിലും നടന്നത് ഭരണകൂട ഭീകരതയാണ്. ഇതിനെതിരെ ബിജെപി ജനകീയ പ്രതിരോധം തീര്ക്കും. സ്ത്രീകള്ക്കും കുട്ടികള്ക്കുമെതിരെ നടന്ന പൊലീസ് അതിക്രമങ്ങള്ക്കെതിരെ ജുഡീഷ്യല് അന്വേഷണം പ്രഖ്യാപിക്കാന് സര്ക്കാര് തയ്യാറാവണം.
സ്ത്രീകളെ റോഡിലൂടെ വലിച്ചിഴച്ചത് പുരുഷ പൊലീസുകാരാണെന്നത് ഗൗരവതരമാണ്. പൊലീസിനെതിരെ സംസ്ഥാന മനുഷ്യാവകാശ കമ്മീഷന് കേസെടുക്കണം. ഗുണ്ടകളും ക്രിമിനലുകളും അഴിഞ്ഞാടുമ്പോള് നോക്കുകുത്തികളാവുന്ന പൊലീസുകാര് പാവങ്ങളുടെ ഭൂമി കയ്യേറാന് കൂട്ടുനില്ക്കുകയാണ്.
നഗ്നമായ കയ്യേറ്റമാണ് സംസ്ഥാന സര്ക്കാര് നടത്തുന്നത്. ജില്ലാ ഭരണകൂടം ജനങ്ങളോട് സംസാരിക്കാന് പോലും തയ്യാറാവാത്തത് പ്രതിഷേധാര്ഹമാണ്. സില്വര്ലൈനിനെതിരെ ബിജെപി ജില്ലാ പ്രസിഡന്റുമാരുടെ പദയാത്രകള് സര്ക്കാരിനുള്ള താക്കീതാവുമെന്നും സുരേന്ദ്രന് പറഞ്ഞു.
