ഇടുക്കി: കരാര് തുക തരാതെ മുന് എംഎല്എയും സിപിഎം നേതാവും വഞ്ചിച്ചെന്നാരോപിച്ച് സിപിഐ പ്രവര്ത്തകന് ആത്മഹത്യക്ക് ശ്രമിച്ചു. പള്ളിവാസലില് കാട് വെട്ടിത്തളിക്കുന്നതിന്റെ കരാറില് ഇടനില നിന്ന ദേവികുളം മുന് എംഎല്എ എസ് രാജേന്ദ്രനും സിപിഎം അടിമാലി മണ്ഡലം സെക്രട്ടറി വിനു സ്കറിയയും ചേര്ന്ന് പറ്റിച്ചതായും പരാതിക്കാരനായ കല്ലാര് സ്വദേശി എന്. രാജേന്ദ്രന് ആരോപിച്ചു.
കരാര് തുക ലഭിച്ചില്ലെന്ന് ആരോപിച്ച് കഴിഞ്ഞ ഞായറാഴ്ചയാണ് രാജേന്ദ്രന് വിഷം കഴിച്ച് ആത്മഹത്യക്ക് ശ്രമിച്ചത്. അപകടനില തരണം ചെയ്തതോടെ വ്യാഴാഴ്ച ഇയാള് ആശുപത്രി വിട്ടു. അടിമാലി സ്വദേശി അബ്ദുള് സലാമിന്റെ പള്ളിവാസലിലെ ഭൂമിയില് കാടുവെട്ടിത്തെളിക്കാന് രാജേന്ദ്രന് പത്ത് ലക്ഷം രൂപയ്ക്ക് കരാറെടുത്തിരുന്നു. ജോലി പൂര്ത്തിയായപ്പോള് അബ്ദുള് സലാം പണം തന്നില്ല. പകരം മൂന്നേക്കര് ഭൂമി തരാമെന്നായി.
എന്നാല് രേഖകള് പരിശോധിച്ചപ്പോള് സ്ഥലം റവന്യൂഭൂമിയെന്ന് കണ്ടെത്തി. ഇതോടെ പണം തന്നെ വേണമെന്ന് ആവശ്യപ്പെട്ടു. ഇതോടെ അവര് രാജേന്ദ്രനെ കൊല്ലുമെന്ന് തിരിച്ച് ഭീഷണിപ്പെടുത്തുകയായിരുന്നു. കരാറില് ദേവികുളം മുന് എംഎല്എ രാജേന്ദ്രനും, സിപിഐ അടിമാലി മണ്ഡലം സെക്രട്ടറിയും ഇടനിലക്കാരായിരുന്നു. ഇവരെ ചെന്ന് കണ്ടെങ്കിലും അവര് കയ്യൊഴിഞ്ഞു. കരാറില് പങ്കില്ലെന്നും ആരോപണങ്ങള്ക്ക് പിന്നില് രാഷ്ട്രീയ എതിരാളികളാണെന്നുമാണ് മുന് ദേവികുളം എംഎല്എയുടെ മറുപടി.
സംഭവത്തില് രാജേന്ദ്രന് പരാതി നല്കിയതിന്റെ അടിസ്ഥാനത്തില് വെള്ളത്തൂവല് പോലീസ് അബ്ദുള് സലാമിനെതിരെ വഞ്ചനാക്കുറ്റത്തിന് കേസെടുത്തു. അതേസമയം കരാറുമായി തനിക്ക് ഒരു ബന്ധവുമില്ല. രണ്ട് കൊല്ലം മുമ്പാണ് സംഭവം നടന്നത്. ഇപ്പോള് വിഷയം വീണ്ടും കുത്തിപ്പൊക്കിയതിന് പിന്നില് സിപിഎമ്മിലെ തന്നെ ചില ആളുകളാണ്. കൂടാതെ തര്ക്കഭൂമിയെക്കുറിച്ച് റവന്യൂ വകുപ്പും ആന്വേഷണം തുടങ്ങി.
