കൊച്ചി: ഡബ്ല്യുസിസിയ്ക്ക് നിലാടില്ലായ്മയുണ്ടെന്ന് നടിയും ഡബ്ബിങ്ങ് ആര്ട്ടിസ്റ്റുമായ ഭാഗ്യലക്ഷ്മി. സംഘടനയുടെ ഭാരവാഹികള്ക്ക് ഇഷ്ടമുള്ള വ്യക്തികള്ക്ക് നേരെ ഉയരുന്ന ആരോപണങ്ങള് ഇവര് മൂടിവെയ്ക്കാറുണ്ട്.
ഡബ്ല്യുസിസി എന്ന സംഘടന രൂപീകരിക്കപ്പെട്ടപ്പോള് താന് ഏറെ സന്തോഷിച്ചിരുന്നു. എന്നാല് സംഘടനയുടെ പല നിലപാടുകളിലും എതിര്പ്പുണ്ടെന്ന് ഭാഗ്യലക്ഷ്മി വ്യക്തമാക്കി. എന്നാല് അസൂയ മൂലമാണ് താന് വിമര്ശിക്കുന്നത് എന്ന് പറയും. ഏതൊരു സംഘടനയും വ്യക്തിയും വിമര്ശനത്തിന് പാത്രമാകണമെന്ന് റിപ്പോര്ട്ടര് ടിവിയ്ക്ക് നല്കിയ അഭിമുഖത്തില് അവര് വ്യക്തമാക്കി.
സ്ത്രീകള്ക്ക് വേണ്ടി സ്ത്രീകള് ചേര്ന്ന് ഉണ്ടാക്കിയ ഒരു കൂട്ടായ്മ. അതിനെ ഒരു സംഘടന എന്ന് പറയാന് കഴിയില്ല. അത് ഒരു കൂട്ടായ്മയാണ്. ഒരുപാട് സ്ത്രീകള്ക്ക് ധൈര്യം നല്കിയ ഒരു കൂട്ടായ്മ. പില്കാലത്ത് അത് രജിസ്റ്റര് ചെയ്തു ഒരു സംഘടനയായി മാറുമെന്ന് ഞാന് പ്രതീക്ഷിച്ചിരുന്നു. എന്നാല് അഞ്ച് വര്ഷത്തിന് ഇപ്പുറവും അത് ഒരു കൂട്ടായ്മ മാത്രമായി നില്ക്കുന്നു. അവര്ക്ക് ഇഷ്ടമുള്ള ആളുകള്ക്ക് നേരെ ഉയരുന്ന ആരോപണങ്ങള് സംഘടന മൂടിവെയ്ക്കുന്നുണ്ട്. വലിയ മാര്ക്കറ്റ് ഉള്ള നടന്മാര്ക്കും നിര്മ്മാതാക്കള്ക്കും എതിരെയുള്ളത് മാത്രം പുറത്തുവന്നാല് പോരല്ലോയെന്നും ഭാഗ്യലക്ഷ്മി ചോദിക്കുന്നു.
