ഉദുമ: സിപിഎം ഭരിക്കുന്ന പഞ്ചായത്തില് സില്വര് ലൈന് പദ്ധതി നടപ്പാക്കുന്നതിനെതിരെ പ്രമേയം പാസായി. ഉദുമ പഞ്ചായത്തിലാണ് പ്രമേയം പാസായത്. സില്വര് ലൈന് പദ്ധതിയില് നിന്നും സംസ്ഥാന സര്ക്കാര് പിന്മാറണമെന്ന് ആവശ്യപ്പെട്ട് യുഡിഎഫാണ് പ്രമേയം അവതരിപ്പിച്ചത്. ഇതിനെ ബിജെപി പിന്തുണച്ചതോടെ പ്രമേയം പാസാക്കുകയായിരുന്നു.
മുസ്ലിം ലീഗിലെ ഹാരിസ് അങ്കക്കളരിയാണ് ഉദുമ പഞ്ചായത്തില് പ്രമേയം അവതരിപ്പിച്ചത്. കോണ്ഗ്രസ് അംഗമായ ചന്ദ്രന് നാലാം വാതുക്കല് പ്രമേയത്തെ പിന്തുണയ്ക്കുകയും ചെയ്യുകയായിരുന്നു. ഉദുമ പഞ്ചായത്തില് സിപിഎം 10, യുഡിഎഫ് 9, ബിജെപി 2 എന്ന നിലയിലാണ് കക്ഷി നില.
ഉദുമ പഞ്ചായത്തിലെ ഏഴോളം വാര്ഡുകളില് കൂടിയാണ് സില്വര് ലൈന് പദ്ധതി കടന്നുപോകുന്നത്. നൂറോളം കുടുംബങ്ങളാണ് കുടിയിറക്കില് ഭീഷണിയില് കഴിയുന്നത്. ഈ പദ്ധതി കേരളത്തിന് തീരെ അനുയോജ്യമല്ലെന്നും പ്രമേയത്തില് പറയുന്നുണ്ട്.
അതേസമയം യുഡിഎഫ് ഭരണകാലത്ത് അതിവേഗ റെയില്വേ പഠനത്തിനായി 28 കോടി മുടക്കിയ പാര്ട്ടിയാണ് ഇപ്പോള് സില്വര് ലൈന് പദ്ധതിക്കെതിരെ പ്രമേയം കൊണ്ടുവരുന്നതെന്ന് സിപിഎം അംഗങ്ങള് കുറ്റപ്പെടുത്തി. ബിജെപി പിന്തുണയോടെ യുഡിഎഫ് പ്രമേയം പാസാക്കിയത് വികസന വിരുദ്ധമായ നീക്കമാണെന്നും പഞ്ചായത്ത് പ്രസിഡന്റ് പി. ലക്ഷ്മി പ്രതികരിച്ചു.
എന്നാല് സര്ക്കാരിനെതിരെ സിപിഎം ഭരിക്കുന്ന പഞ്ചായത്ത് ഭരണസമിതിയില് പ്രമേയം പാസാക്കാനായത് ആദ്യസംഭവമാണ്. അംഗങ്ങളെ അഭിനന്ദിക്കുന്നതായി പഞ്ചായത്ത് യുഡിഎഫ് കമ്മിറ്റി അറിയിച്ചു.
