പയ്യന്നൂര്: അപൂര്വ്വ സ്റ്റാമ്പുകള് മാത്രമല്ല തീയതികള് ഒത്തുവരുന്ന ദിവസങ്ങളിലെ തപാല് സീലുകള്, പോസ്റ്റ് കാര്ഡുകള്, ഇന്ലെന്റുകള്, കവറുകള്, സ്പെഷല് കവറുകള് എന്നിവയിലെല്ലാം പതിച്ചുവാങ്ങി തന്റെ ഓട്ടോമ്യൂസിയത്തില് പ്രദര്ശിപ്പിക്കുന്ന പതിവുരീതി തെറ്റിക്കാതെ സുമേഷ് ദാമോദരന്.
02. 02. 22 എന്ന അത്യപൂര്വ്വ തീയതി ഒത്തുവന്ന ദിവസവും പയ്യന്നൂര് എടാട്ട് പോസ്റ്റ് ഓഫീസിലെത്തി ഉരുപ്പടികളില് തപാല് സീല് ശേഖരിച്ച് പോസ്റ്റര് ജീവനക്കാരുടെ അനുമോദനം സ്വീകരിച്ചിരിക്കുകയാണ് ഓട്ടോ ഡ്രൈവറായ സുമേഷ് ദാമോദരന്. ഇതുസംബന്ധമായി പോസ്റ്റല് അധികൃതര് സുമേഷ് ദാമോദരന് പ്രത്യേക കീര്ത്തി പത്രവും നല്കി. ഓള് കേരള സുരേഷ് ഗോപി ഫാന്സ് അസോസിയേഷന് കണ്ണൂര് ജില്ലാ പ്രസിഡന്റ് കൂടിയായ സുമേഷ് ദാമോദരന് ഇഷ്ടതാരത്തിന് ഏറ്റവും കൂടുതല് കത്തുകളെഴുതിയ റിക്കാര്ഡിന് ഉടമകൂടിയാണ്.
02.02.22 എന്ന തീയതി ഒത്തു വന്ന ദിനത്തിലും സൂപ്പര് താരം സുരേഷ് ഗോപിക്ക് പ്രത്യേകദിന ആശംസ അയക്കാന് സുമേഷ് ദാമോദരന് മറന്നില്ല. 02.02.22 എന്ന തീയതിവച്ചുള്ള പോസ്റ്റല് സീല് പതിച്ച തപാല് കാര്ഡ്, ഇന്ലന്റ്, കവര്, സ്പെഷല് കാര്ഡ് എന്നിവ പയ്യന്നൂര് എടാട്ട് പോസ്റ്റ് വുമണ് കെ. അഞ്ജനയില് നിന്ന് സുമേഷ് ദാമോദരന് ഔേദ്യാഗികമായി ഏറ്റുവാങ്ങുകയും ചെയ്തു. പോസ്റ്റ് മാസ്റ്റര് കെ. വിനോദ് കുമാര്, ഡാക് സേവക് കെ.ടി.പി. കുഞ്ഞിരാമന് തുടങ്ങിയവര് സന്നിഹിതരായി.
പയ്യന്നൂര് പഴയ ബസ് സ്റ്റാന്റിലെ ഓട്ടോ ഡ്രൈവറായ സുമേഷ് ദാമോദരന്റെ ശ്രീലക്ഷ്മി എന്ന പേരിലുള്ള ഓട്ടോ സഞ്ചരിക്കുന്ന ഫിലാറ്റലി മ്യൂസിയം എന്ന പേരില് ഇതിനകംതന്നെ ഖ്യാതിനേടിയിട്ടുണ്ട്. അപൂര്വ്വ സ്റ്റാമ്പുകള്, കറന്സികള്, നാണയങ്ങള്, ബര്ത്ത് ഡേ കറന്സികള് എന്നിവയാല് സുമേഷ് ദാമോദരന്റെ ശ്രീലക്ഷ്മി ഓട്ടോ യാത്രക്കാരുടെ പ്രശംസ നേരത്തേത്തന്നെ ഏറ്റുവാങ്ങിയതാണ്. സുരേഷ് ഗോപിയുടെ ബര്ത്ത്ഡേ കറന്സി കാര്ഡ് തയാറാക്കി നേരിട്ടു കൈമാറാനായതാണ് സുമേഷ് ദാമോദരന്റെ ജീവിതത്തിലെ അപൂര്വ്വ നിമിഷങ്ങളിലൊന്ന്.
ഓള് കേരളാ ഭരത് സുരേഷ് ഗോപി ഫാന്സ് കണ്ണൂര് ജില്ലാ പ്രസിഡന്റ്, കാനന്നൂര് ഫിലാറ്റലി ക്ലബ് ലൈഫ് മെമ്പര്, പരിസ്ഥിതി സംഘടനയായ സീക് അംഗം, ബിഎംഎസ് എക്സിക്യൂട്ടീവ് അംഗം, എടാട്ട് ശ്രീനാരായണ സ്കൂള് പിടിഎ പ്രസിഡന്റ്, ബിജെപി കുഞ്ഞിമംഗലം പഞ്ചായത്ത് കമ്മറ്റി പ്രസിഡന്റ് എന്നീ സ്ഥാനങ്ങളും സുമേഷ് വഹിച്ചുവരുന്നുണ്ട്.
