കൊല്ലം: ദളിത് സേന എന്ന സംഘടനയുമായി ബന്ധപ്പെട്ട് ഡല്ഹി യാത്രയ്ക്കിടെ പീഡിപ്പിക്കാന് ശ്രമിച്ചതായി മൈലം ഗ്രാമപഞ്ചായത്തിലെ മുന് അംഗത്തിന്റെ പരാതി.
ദളിത് സേനാ വനിതാസെല് സംസ്ഥാന അധ്യക്ഷയും മൈലം ഗ്രാമപഞ്ചായത്ത് മുന് അംഗവുമായ സിന്ധു യശോധരന് ആണ് റൂറല് ജില്ലാ പോലീസ് മേധാവിക്ക് പരാതി നല്കിയത്. ബന്ധുവും ദളിത് സേനാ യുവജന വിഭാഗം മുന് ഭാരവാഹിയും ക്രിക്കറ്റ് പരിശീലകനുമായ യുവാവിനെതിരെയാണ് പരാതി. കഴിഞ്ഞ ജൂലൈയില് ഡല്ഹിയില് വച്ചായിരുന്നു പീഡനശ്രമം. ദളിത് സേന സംസ്ഥാന ഭാരവാഹിക്കും ബന്ധുകൂടിയായ യുവാവിനുമൊപ്പം സംഘടനയുടെ കേന്ദ്രനേതാവിനെ കാണാനാണ് തന്നെ ഡല്ഹിയിലേക്കു കൊണ്ടുപോയത്. ദളിത് സേന സംസ്ഥാന വനിതാസെല് ഭാരവാഹിയായി തന്നെ നേതാവ് പ്രഖ്യാപിച്ചു.
അന്നേ ദിവസം ഹോട്ടല് മുറിയിലാണ് പീഡന ശ്രമമുണ്ടായത്. നാട്ടിലെത്തി പരാതിപ്പെട്ടതിനെ തുടര്ന്ന് യുവാവിനെ സംഘടനയില് നിന്നും പുറത്താക്കി. എന്നിട്ടും യുവാവ് തനിക്കും കുടുംബത്തിനുമെതിരെ അപവാദം പ്രചരിപ്പിക്കുകയും തന്റെ ഫോട്ടോകളുണ്ടെന്ന് ഭീഷണിപ്പെടുത്തുകയും ചെയ്യുന്നു. തുടര്ന്നാണ് പോലീസില് പരാതി നല്കാന് തീരുമാനിച്ചതെന്ന് സിന്ധു യശോധരന് പറഞ്ഞു. പഞ്ചായത്ത് തിരഞ്ഞെടുപ്പില് രണ്ടു തവണയും സ്വതന്ത്രയായി മത്സരിച്ചു വിജയിച്ചിട്ടുള്ള സിന്ധു യശോധരന് കഴിഞ്ഞ തെരഞ്ഞെടുപ്പില് തുച്ഛമായ വോട്ടുകള്ക്കാണ് പരാജയപ്പെട്ടത്.
