ന്യൂദല്ഹി: ഏഴുപത്തിറ്റാണ്ടിനു ശേഷം ടാറ്റ ഗ്രൂപ്പ് എയര് ഇന്ത്യയുടെ നിയന്ത്രണം ഏറ്റെടുത്തതിന് പിന്നാലെ വിമാനങ്ങളിലെ യാത്രക്കാര്ക്കായി പ്രത്യേക സന്ദേശവുമായി രത്തന് ടാറ്റ. എയര് ഇന്ത്യയുടെ എല്ലാ യാത്രക്കാര്ക്കും അദ്ദേഹം സ്വാഗതം ആശംസിച്ചു. എയര് ഇന്ത്യയെ മെച്ചപ്പെട്ട ഒരു സാഹചര്യത്തിലേക്ക് എത്തിക്കാന് ശ്രമിക്കുമെന്നായിരുന്നു രത്തന് ടാറ്റയുടെ സന്ദേശം.
യാത്രക്കാരുടെ സൗകര്യവും മികച്ച സേവനവും ഉറപ്പാക്കി എയര് ഇന്ത്യയെ യാത്രക്കാരുടെ പ്രിയപ്പെട്ട എയര്ലൈനാക്കി മാറ്റുന്നതിന് ഒരുമിച്ച് പ്രവര്ത്തിക്കുന്നതില് സന്തോഷമുണ്ടെന്ന് ടാറ്റ പറഞ്ഞു. നേരത്തെ തയ്യാറാക്കി റെക്കോര്ഡ് ചെയ്ത സന്ദേശമാണ് ഫ്ലൈറ്റിനുള്ളില് കേള്പ്പിച്ചത്. ഈ സന്ദേശം ടാറ്റ എയര്ലൈന്സ് സമൂഹമാധ്യമങ്ങളിലൂടെ പങ്കുവെച്ചു. 2021 ഒക്ടോബര് എട്ടിനായിരുന്നു 18,000 കോടി രൂപയ്ക്ക് സര്ക്കാരില് നിന്ന് എയര് ഇന്ത്യയെ 69 വര്ഷങ്ങള്ക്ക് ശേഷം ടാറ്റ തിരിച്ചുപിടിച്ചത്.
