ഇസ്ലാമാബാദ്: പുതിയ ക്രിക്കറ്റ് നിയമങ്ങള് ബാറ്റര്മാര്ക്കു കൂടുതല് അനുകൂലമാക്കി മാറ്റുന്ന തരത്തിലേക്ക് ഐസിസി പരിഷ്കരിച്ചതിനെ രൂക്ഷമായി വിമര്ശിച്ച് പാക് മുന് ഫാസ്റ്റ് ബൗളര് ഷോയിബ് അക്തര്. മുമ്പത്തെക്കാള് ക്രിക്കറ്റ് വളരെയധികം മാറിപ്പോയതായും അന്നു ബൗളര്മാര്ക്കു കുറേക്കൂടി പ്രാധാന്യം ഉണ്ടായിരുന്നുവെന്നും അക്തര് അഭിപ്രായപ്പെട്ടു. മുന് ഇന്ത്യന് കോച്ച് രവി ശാസ്ത്രിയുമായി സംസാരിക്കുകയായിരുന്നു അക്തര്.
നിലവിലെ നിയമങ്ങള് ബാറ്റര്മാര്ക്ക് അനുകൂലമാണെന്നും ക്രിക്കറ്റിനെ ഏകപക്ഷീയമായ ഗെയിമാക്കി മാറ്റിയതായും അക്തര് പറഞ്ഞു. ‘ഇപ്പോഴത്തെ ക്രിക്കറ്റില് നിങ്ങള്ക്കു രണ്ടു തവണ ന്യൂ ബോളെടുക്കാം. നിയമങ്ങള് കൂടുതല് കര്ക്കശമാക്കിയിരിക്കുന്നു. അടുത്ത കാലത്തായി നിങ്ങള് ബാറ്റര്മാര്ക്കു വളരെയധികം പ്രാമുഖ്യം നല്കുന്നു. നിങ്ങള്ക്ക് ഇപ്പോള് ഒരു മല്സരത്തില് മൂന്ന് റിവ്യുകള് അനുവദിക്കപ്പെട്ടിട്ടുണ്ട്. സച്ചിനോട് എനിക്ക് സഹതാപം ഉണ്ട്, അത് തോന്നാന് കാരണം, സച്ചിന് തെണ്ടുല്ക്കര് കളിച്ചിരുന്ന സമയത്ത് ഇതുപോലെ മൂന്നു റിവ്യുകള് ഉണ്ടായിരുന്നുവെങ്കില് അദ്ദേഹം ഒരു ലക്ഷം റണ്സെങ്കിലും നേടുമായിരുന്നു’ ഷോയിബ് അക്തര് പറഞ്ഞു.
അദ്ദേഹം തുടക്കത്തില് വസീം അക്രം, വഖാര് യൂനിസ് എന്നിവര്ക്കെതിരെയാണ് കളിച്ചത്, അദ്ദേഹം ഷെയ്ന് വോണിനെതിരെയും കളിച്ചു, പിന്നീട് ബ്രെറ്റ് ലീയെയും എന്നെയും നേരിട്ടു, പിന്നീട് അദ്ദേഹം അടുത്ത തലമുറയിലെ ഫാസ്റ്റ് ബൗളര്മാരെയും നേരിട്ടു. അതുകൊണ്ടാണ് ഞാന് അദ്ദേഹത്തെ വളരെ കടുപ്പമേറിയ ബാറ്റ്സ്മാന് എന്ന് വിളിക്കുന്നതെന്നും ഷോയിബ് പറഞ്ഞു.
