പാലാ: കിടങ്ങൂരില് ഒറ്റയ്ക്ക് താമസിക്കുന്ന 88 വയസുള്ള വയോധികയെ വീട്ടില് അതിക്രമിച്ച് കയറി പീഡിപ്പിപ്പിക്കാന് ശ്രമിച്ച യുവാവ് അറസ്റ്റില്. കിടങ്ങൂര് മംഗളാരം പള്ളിക്ക് സമീപം താമസിക്കുന്ന കാഞ്ഞിരക്കാട്ട് പ്രസാദ് (20) ആണ് പോലീസിന്റെ പിടിയിലായത്.
മുന്പരിചയം വെച്ചാണ് യുവാവ് വയോധികയുടെ വീട്ടിലെത്തിയത്. അവിടെ മറ്റാരും ഇല്ലെന്ന് മനസിലാക്കി മുറിയില് അതിക്രമിച്ച് കടന്ന് അവരെ കയറിപ്പിടിക്കുകയായിരുന്നുന്നെന്ന് പോലിസ് പറഞ്ഞു. ബലപ്രയോഗത്തിലൂടെ വയോധികയെ കീഴ്പെടുത്താന് ശ്രമിച്ചെങ്കിലും എതിര്ത്തതോടെ യുവാവ് കടന്നു കളഞ്ഞു. ഇതിനിടെ പരിക്ക് പറ്റിയ സ്ത്രീ ആശുപത്രിയില് ചികിത്സ തേടി.
സംഭവ സ്ഥലത്ത് നിന്ന് രക്ഷപെട്ട പ്രസാദിനെ കിടങ്ങൂര് എസ് എച്ച്ഒ ബിജു കെ.ആര്, സബ്ബ് ഇന്സ്പെക്ടര് കുര്യന് മാത്യു, എഎസ്ഐ ബിജു ചെറിയാന്, ആഷ് ചാക്കോ എന്നിവരടങ്ങിയ സംഘം നടത്തിയ തിരച്ചിലില് ഒളിസ്ഥലത്ത് നിന്ന് രാത്രിതന്നെ പിടികൂടി. മുമ്പ് തിരുവഞ്ചൂര് ജുവനൈല് ഹോമിലെ അന്തേവാസിയായിരുന്ന പ്രതി ഇപ്പോള് ലഹരിയ്ക്കടിമയായി നാട്ടില് കറങ്ങി നടക്കുകയായിരുന്നു. കോടതിയില് ഹാജരാക്കിയ പ്രതിയെ റിമാന്റ് ചെയ്തു.
