ആലപ്പുഴ: വര്‍ഗീയ കലാപത്തിന് സമൂഹമാദ്ധ്യമങ്ങളിലൂടെ സന്ദേശങ്ങള്‍ പ്രചരിപ്പിച്ച കേസില്‍ പോപ്പുലര്‍ ഫ്രണ്ടുകാരന്‍ അറസ്റ്റില്‍. പ്രയാര്‍ വടക്ക് മുറിയില്‍ കണ്ണമത്ത് കിഴക്ക് വീട്ടില്‍ നൂറുദ്ദീന്‍കുട്ടി മകന്‍ കുഞ്ഞുമോന്‍ എന്ന് വിളിക്കുന്ന ഹര്‍ഷാദ് (35)നെയാണ് കായംകുളം പോലിസ് അറസ്റ്റ് ചെയ്തത്.
ആലപ്പുഴയില്‍ ബിജെപി, എസ്ഡിപിഐ നേതാക്കളുടെ കൊലപാതകത്തെ തുടര്‍ന്ന് ഫേസ്ബുക്ക് പ്രൊഫൈല്‍ വഴി വിദ്വേഷകരമായ വാചകങ്ങള്‍ പോസ്റ്റ് ചെയ്ത് പ്രചരിപ്പിച്ച് സമൂഹത്തില്‍ പരസ്പര ലഹള ഉണ്ടാക്കുന്നതിന് ശ്രമിക്കുകയായിരുന്നു. ഹര്‍ഷാദിന്റെ മൊബൈല്‍ ഫോണ്‍ ഫോറന്‍സിക് ലാബില്‍ അയച്ച് ശാസ്ത്രീയ പരിശോധന നടത്തി തെളിവുകള്‍ ശേഖരിക്കുന്നതിനായി പിടിച്ചെടുത്തു.
ജില്ലയിലെ സാമൂഹിക മാധ്യമങ്ങള്‍ പോലീസ് നിരീക്ഷണത്തിലാണ്. സോഷ്യല്‍ മീഡിയാ അക്കൗണ്ടുകള്‍ പോലീസ് പരിശോധിച്ചുവരുന്നു. മതസൗഹാര്‍ദ്ദം തകര്‍ക്കുന്ന പ്രചരണം നടത്തുന്ന വ്യക്തികളും സംഘടനകളും സൈബര്‍ പോലീസിന്റെ നിരീക്ഷണത്തിലാണ്. പ്രകോപനപരമായ സന്ദേശങ്ങള്‍ പ്രചരിപ്പിച്ചാല്‍ കടുത്ത നടപടികള്‍ ഉണ്ടാകുമെന്ന് ജില്ലാ പോലീസ് മേധാവി ജി ജയ്‌ദേവ് അറിയിച്ചു.
