പാലക്കാട്: പുതുപ്പരിയാരം പഞ്ചായത്തിലെ മുല്ലക്കര പട്ടികവകുപ്പ് കോളനിയിലെ കുടിവെള്ള പ്രശ്നം പരിഹരിക്കണമെന്നാവശ്യപ്പെട്ട് ആദിഗോത്രസഭ നടത്തിയ ധര്ണ ജില്ലാ പ്രസിഡന്റ് സി. ഹരി ഉദ്ഘാടനം ചെയ്തു. സെക്രട്ടറിമാരായ എ.യു. അജീഷ്, ആര്. ശിവന് കിഴക്കഞ്ചേരി, എം.വി. വീരേന്ദ്രന് മണ്ണാര്ക്കാട്, ആര്. ചിന്നപ്പന്, സന്തോഷ് മലമ്പുഴ, സോമസുന്ദരം വാളയാര്, ബാലന് കാഞ്ഞിരപ്പുഴ, ഉണ്ണികൃഷ്ണന്, രത്നസ്വാമി സംസാരിച്ചു.
കോളനിയില് 35 വനവാസി കുടുംബങ്ങളാണുള്ളത്. ഇവര്ക്കുള്ള കുടിവെള്ള ആവശ്യത്തിന് കുഴല്ക്കിണറും മോട്ടറും സ്ഥാപിക്കുകയും നല്ല രീതിയില് പ്രവര്ത്തിച്ചിരുന്നതുമാണ്. എന്നാല് ഒരുമാസത്തില് അധികമായി മോട്ടര് പ്രവര്ത്തനം നിലച്ചിരിക്കുകയാണ്. ഇതുസംബന്ധിച്ച് ഗ്രാമപഞ്ചായത്തില് നിവേദനം നല്കിയെങ്കിലും യാതൊരു നടപടിയുമുണ്ടായില്ല.
അരക്കിലോമീറ്റര് അകലെയുള്ള കിണറ്റില് നിന്ന് വെള്ളം ശേഖരിക്കേണ്ട അവസ്ഥയാണിപ്പോഴുള്ളത്.
