ന്യൂദല്ഹി: പശ്ചിമഘട്ട സംരക്ഷണ വ്യവസ്ഥകളുടെ കരടു വിജ്ഞാപനത്തിന്റെ കാലാവധി ജൂണ് 30 വരെ നീട്ടി. 2018 ഒക്ടോബര് മൂന്നിന് ഇറക്കിയ നാലാമത്തെ കരട് വിജ്ഞാപനത്തിന്റെ കാലാവധി 2021 ഡിസംബര് 31നാണ് അവസാനിക്കേണ്ടിയിരുന്നത്. ഈ സാഹചര്യത്തിലാണ് കാലാവധി നീട്ടിയത്. സംസ്ഥാനങ്ങളുമായി വ്യവസ്ഥകള് സംബന്ധിച്ച് ചര്ച്ചകള് തുടരുന്നതും കൊവിഡ് സാഹചര്യവും കണക്കിലെടുത്താണ് കാലാവധി നീട്ടിയത്.
കര്ശന നിയന്ത്രണങ്ങളുള്ള പരിസ്ഥിതി ലോല മേഖലയുടെ പരിധിയില്നിന്ന് 1337.24 ചതുരശ്ര കിലോമീറ്റര് കൂടി ഒഴിവാക്കണമെന്നാണ് കേരളം ആവശ്യപ്പെട്ടത്. കര്ണാടക ഉള്പ്പെടെയുള്ള സംസ്ഥാനങ്ങളും ഇളവുകള് ആവശ്യപ്പെട്ടിട്ടുണ്ട്. ജൂണ് 30നകം ധാരണയുണ്ടാക്കി അന്തിമ വിജ്ഞാപനമിറക്കാനാണ് ഇപ്പോഴത്തെ നീക്കം.
2013ല് കസ്തൂരിരംഗന് സമിതിയുടെ ശുപാര്ശകളുടെ അടിസ്ഥാനത്തില് ഇറക്കിയ ഓഫിസ് മെമ്മോറാണ്ടമാണ് ഇപ്പോള് പ്രാബല്യത്തിലുള്ളത്. ഇതുപ്രകാരം ഖനനം, ക്വാറി, മണല് വാരല്, ചുവപ്പു ഗണത്തിലുള്ള വ്യവസായങ്ങള്, താപോര്ജ നിലയം, 20,000 ചതുരശ്ര മീറ്ററെങ്കിലുമുള്ള കെട്ടിടങ്ങളും മറ്റു നിര്മാണങ്ങളും, 50 ഹെക്ടറെങ്കിലുമുള്ളതോ 1.5 ലക്ഷം ചതുരശ്ര മീറ്റര് നിര്മാണമുള്ളതോ ആയ ടൗണ്ഷിപ്, മറ്റു വികസന പദ്ധതികള് എന്നിവയ്ക്ക് പരിസ്ഥിതി ലോലമേഖലയില് പൂര്ണനിരോധനമാണ്.
