കൊല്ലം: മലയാള സിനിമയുടെ ആക്ഷന്‍ ഹീറോയായിരുന്ന മഹാനടന്‍ ജയന്റെ ജീവിതം അക്ഷരങ്ങളിലൂടെ പുനഃരാവിഷ്‌ക്കരിക്കുന്ന നോവല്‍ ‘അജയ്യം’ വായനക്കാര്‍ക്ക് പരിചയപ്പെടുത്തുകയാണ് എഴുത്തുകാരനായ ബിനോയി തങ്കച്ചന്‍. കൃഷ്ണന്‍നായര്‍ എന്ന ജയന്റെ ജീവിതവേരുകളിലേക്ക് ഇറങ്ങി അദ്ദേഹത്തിന്റെ പച്ചയായ ജീവിതസാഹചര്യങ്ങളെയും സൂപ്പര്‍ സ്റ്റാര്‍ ജയന്‍ കാലഘട്ടത്തിന്റെ പൊരുളുകളേയും തേടാന്‍ ഒരു ശ്രമം നടത്തുകയാണ് ഗ്രന്ഥകര്‍ത്താവിവിടെ. മലയാള സിനിമയുടെ നട്ടെല്ലാകേണ്ടിയിരുന്ന ഒരു നടന വിസ്മയത്തിന്റെ വേര്‍പാടുണ്ടാക്കിയ നഷ്ടസ്വപ്‌നങ്ങളെയും നോവലിലുടനീളം വായനക്കാരന് തൊട്ടറിയാന്‍ സാധിക്കും.
രണ്ടുവര്‍ഷം മാത്രം ചലച്ചിത്ര രംഗത്ത് നായകനായി തിളങ്ങിയ വ്യക്തിയുടെ പേര് കാലങ്ങള്‍ കടന്നുപോയിട്ടും കേരളക്കരയുടെ നെഞ്ചകങ്ങളില്‍ നിന്ന് മാഞ്ഞുപോയിട്ടില്ല. അത് കൂടുതല്‍ തെളിഞ്ഞുവരികയാണ്. ‘കസ്തൂരിമാന്‍മിഴി മലര്‍ശരമെയ്തു’ എന്നു തുടങ്ങുന്ന ആ ഒരു ഗാനം മതിയാകും മലയാള മനസ്സില്‍ ജയന്റെ ആ വീര്യം നിറഞ്ഞ മുഖവും പ്രണയം വിടരുന്ന കണ്ണുകളും വേറിട്ട പുഞ്ചിരിയും തെളിഞ്ഞുവരാന്‍. അദ്ദേഹത്തിന്റെ ഈ പ്രത്യേകതയുടെ പിന്നിലെ രഹസ്യമെന്താണന്നുള്ള ചോദ്യങ്ങള്‍ക്കുള്ള ഉത്തരമാണ് പുനലൂര്‍ സ്വദേശിയായ ബിനോയ് തങ്കച്ചന്‍ ഈ പുസ്തകത്തിലൂടെ വായനക്കാര്‍ക്ക് സമ്മാനിക്കുന്നത്.
തേവള്ളി പോന്നച്ചം വീട്ടിലെ ജയന്റെ ജനനം മുതല്‍ കോളിളക്കം സിനിമയിലെ വീരനായകന്റെ ഹെലികോപ്ടറില്‍ നിന്ന് വീണുള്ള വേദനാജനകമായ വേര്‍പാട് വരെ ഒരു തൂവല്‍ പറന്നിറങ്ങുന്ന ലാഘവത്തോടെ വായനക്കാരന്റെ മനസ്സിലേക്ക് പതിയുന്ന ഏടുകളാണ് പുസ്തകത്തിന്റെ ഓരോ പേജുകളും. നൂറിലധികം സിനിമകളില്‍ കണ്ട അദ്ദേഹത്തിന്റെ വസ്ത്രധാരണം പോലും സൃഷ്ടിച്ച വിപ്ലവം ചെറുതല്ല.
അഭിനയ പ്രജാപതിയായ ജയന്റെ ഓരോ ഡയലോഗുകളും പ്രത്യേക ശരീരഭാഷയും ഇന്നത്തെ തലമുറയ്‌ക്ക് പോലും നിസാരമായി ഗ്രഹിക്കാന്‍ കഴിയുന്നുണ്ടെങ്കില്‍, കോമഡി റിയോലിറ്റി ഷോകളില്‍ അദ്ദേഹത്തിന്റെ വേഷപകര്‍ച്ചകളും സംഭാഷണവുമെല്ലാം കലാകാരന്മാര്‍ ഇന്നും പൊടിതട്ടിയെടുക്കുന്നുണ്ടെങ്കില്‍ അദ്ദേഹമൊരു പ്രതിഭാസം തന്നെയായിരുന്നു. ഈ വൈകാരികത ബിനോയ് തങ്കച്ചന്‍ എഴുത്തിലൂടെ വായനക്കാര്‍ക്ക് പകര്‍ന്നു നല്‍കുന്നുണ്ട്. പുനലൂര്‍ ഇളമ്പല്‍ സ്വദേശിയായ ബിനോയ് തങ്കച്ചന്റെ പുസ്തകം പ്രസിദ്ധീകരിച്ചിരിക്കുന്നത് പ്രവ്ദ പബ്ലിക്കേഷന്‍സ് ആണ്. 450 രൂപയാണ് വില.
കൊട്ടാരക്കരയില്‍ ഫിനാക്ക് അക്കൗണ്ട്സ് ബ്യൂറോ എന്ന ഓഡിറ്റിങ് സ്ഥാപനം നടത്തുന്ന ബിനോയ് തങ്കച്ചന്റെ ആദ്യ നോവല്‍ ‘ലെജന്‍ഡ്’ വിങ്സ് പബ്ലിക്കേഷന്‍ ഇന്റര്‍നാഷണലിന്റെ ഗോള്‍ഡന്‍ വിങ്സ് ബുക്ക് പുരസ്‌കാരത്തിന് അര്‍ഹമായിട്ടുണ്ട്. ഭാര്യ: ലിന്‍സി. എച്ച്ഡിഎഫ്സി റിലേഷന്‍ഷിപ്പ് മാനേജറായ എം. അഞ്ജു ആണ് പുസ്തകം എഡിറ്റ് ചെയ്തിട്ടുള്ളത്.
ജന്മഭൂമി ഓണ്‍ലൈന്‍