തിരുവനന്തപുരം: 15 മുതല് 18 വയസുവരെ പ്രായമുള്ള കുട്ടികളുടെ കോവിഡ് വാക്സിനേഷനായും കരുതല് ഡോസിനായും സംസ്ഥാനം മുന്നൊരുക്ക പ്രവര്ത്തനങ്ങള് ആരംഭിച്ചു. കുട്ടികളുടെ വാക്സിനേഷനായി കേന്ദ്രങ്ങളില് പ്രത്യേക സംവിധാനങ്ങളൊരുക്കും. മുതിര്ന്നവരുടേയും കുട്ടികളുടേയും വാക്സിനേഷനുകള് തമ്മില് കൂട്ടിക്കലര്ത്തില്ലെന്നും സംസ്ഥാന സര്ക്കാര് അറിയിച്ചു.
കുട്ടികള്ക്ക് ആദ്യമായി കോവിഡ് വാക്സിന് നല്കുന്നതിനാല് എല്ലാ സുരക്ഷാ മുന്കരുതലുകളും സ്വീകരിച്ചായിരിക്കും വാക്സിന് നല്കുക. വാക്സിനേഷന് മുമ്പും ശേഷവും കുട്ടികളെ നിരീക്ഷിച്ച് ആരോഗ്യനില ഉറപ്പാക്കും. കുട്ടികള്ക്ക് കോവാക്സിനായിരിക്കും നല്കുക എന്നാണ് കേന്ദ്രം അറിയിച്ചിട്ടുള്ളത്. 15 ലക്ഷത്തോളം വരുന്ന കുട്ടികളാണ് ഈ വിഭാഗത്തില് വരുന്നത്. ഒമിക്രോണ് പശ്ചാത്തലത്തതില് എല്ലാവരും തങ്ങളുടെ കുട്ടികള്ക്ക് വാക്സിന് ലഭിച്ചിട്ടുണ്ടെന്ന് ഉറപ്പ് വരുത്തണമെന്നും സംസ്ഥാന ആരോഗ്യമന്ത്രി അഭ്യര്ത്ഥിച്ചു.
കേന്ദ്ര ആരോഗ്യ മന്ത്രാലയത്തിന്റെ മാര്ഗനിര്ദേശങ്ങള് അനുസരിച്ചായിരിക്കും ആരോഗ്യ പ്രവര്ത്തകര്, മുന്നിര പ്രവര്ത്തകര്, 60 വയസിന് മുകളിലുള്ള അനുബന്ധ രോഗമുള്ളവര് എന്നിവര്ക്ക് കരുതല് ഡോസ് നല്കുക. രണ്ടാം ഡോസ് വാക്സിന് എടുത്ത ശേഷം ഒമ്പത് മാസങ്ങള്ക്ക് ശേഷമാണ് കരുതല് ഡോസ് നല്കുന്നത്.
