തിരുവനന്തപുരം : ക്രിമിനല് കേസുകളില് ഉള്പ്പെട്ടിരിക്കുന്നവരുടെ വിവരങ്ങള് ശേഖരിക്കാന് നിര്ദ്ദേശവുമായി സംസ്ഥാന പോലീസ് മോധാവി അനില്കാന്ത്. ആലപ്പുഴയിലുണ്ടായ ഇരട്ടകൊലപാതകങ്ങളുടെ പശ്ചാത്തലത്തിലാണ് ഡിജിപി നിര്ദ്ദേശം പുറത്തിറക്കിയത്. ഇതുപ്രകാരം സമീപ കാലത്ത് കേരളത്തിലുണ്ടായ ആക്രമണങ്ങളിലും കൊലപാതകങ്ങളിലും നേരിട്ട് പങ്കാളിത്തമുള്ളവരുടെ വിവരങ്ങള് ശേഖരിക്കും.
കൂടാതെ വാറണ്ട് നിലവിലുള്ള പ്രതികളേയും ഒഴിവില് കഴിയുന്ന പ്രതികളേയും കണ്ടെത്തി അറസ്റ്റ് ചെയ്യും. ക്രിമിനലുകളുടെയും മുമ്പ് കേസുകളില് പെട്ടവരുടെയും പട്ടിക ജില്ലാടിസ്ഥാനത്തില് തയ്യാറാക്കണം. കേസില് പ്രതികളായി ജാമ്യത്തില് കഴിയുന്നവര് ജാമ്യവ്യവസ്ഥകള് ലംഘിക്കുന്നുണ്ടോയെന്ന് പരിശോധിക്കും. മറ്റു കേസുകളില് തുടര്ച്ചയായ പരിശോധനയും നടപടികളും ഉണ്ടാകും.
കൊലപാതകങ്ങളില് നേരിട്ടു പങ്കെടുത്തവരുടെയും അവ ആസൂത്രണം ചെയ്തവരുടെയും, വാഹനവും ആയുധവും ഫോണും നല്കി സഹായിച്ചവരുടെയും വിവരങ്ങള് ശേഖരിച്ച് അറസ്റ്റ് ഉള്പ്പെടെയുള്ള നിയമനടപടികള് സ്വീകരിക്കും. അക്രമണങ്ങള്ക്ക് പണം നല്കിയവരെയും പ്രതികളെ ഒളിപ്പിച്ചവരേയും കണ്ടെത്തി കേസെടുക്കും. ക്രിമിനല് സംഘങ്ങള്ക്ക് പണം കിട്ടുന്ന സ്രോതസ്സ് കണ്ടെത്താന് ആവശ്യമായ അന്വേഷണം നടത്തി മേല്നടപടി സ്വീകരിക്കും.
വര്ഗീയ വിദ്വേഷം പരത്തുന്ന തരത്തില് സാമൂഹികമാധ്യമങ്ങളില് നിരവധി സന്ദേശങ്ങള് പ്രചരിക്കുന്നതായി ശ്രദ്ധയില്പ്പെട്ടിട്ടുണ്ട്. ഇത്തരം സന്ദേശങ്ങളും വ്യാജവാര്ത്തകളും പ്രചരിപ്പിക്കുന്നവരെ കണ്ടെത്തി നടപടി സ്വീകരിക്കാന് എല്ലാ ജില്ലാ പോലീസ് മേധാവിമാര്ക്കും പ്രത്യേക നിര്ദ്ദേശം നല്കി. ഇത്തരം ചര്ച്ചകള്ക്ക് അനുവാദം നല്കുന്ന ഗ്രൂപ്പുകളിലെ അഡ്മിന്മാരെയും കേസില് പ്രതിയാക്കും. സാമൂഹ്യമാധ്യമങ്ങളില് നിരന്തരം നിരീക്ഷണം നടത്താന് എല്ലാ ജില്ലകളിലേയും സൈബര് വിഭാഗത്തെയും ഡിജിപി ചുമതലപ്പെടുത്തിയിട്ടുണ്ട്.
