രാജ്കോട്ട്: വിജയ് ഹസാരെ ക്രിക്കറ്റ് ടൂര്ണമെന്റില് കേരളത്തിന്റെ വിജയ യാത്ര തുടരുന്നു. ഇന്നലെ ഗ്രൂപ്പിലെ അവസാന മത്സരത്തില് ഉത്തരാഖണ്ഡിനെ അഞ്ച് വിക്കറ്റിന് തോല്പ്പിച്ചു. ഇതോടെ ക്വാര്ട്ടര് ഫൈനല് ഉറപ്പായി. ഗ്രൂപ്പ് ചാമ്പ്യന്മാരായാണ് കേരളം ക്വാര്ട്ടര് ഉറപ്പിച്ചത്. അഞ്ച് മത്സരങ്ങളില് കേരളത്തിന്റെ നാലാം ജയമാണിത്. സ്കോര്: ഉത്തരാഖണ്ഡ് – 224/9, കേരളം – 225/5 (35.4).
ബൗളര്മാരുടെ മികവ് തുടര്ന്നതും ബാറ്റിങ് നിര കൂടുതല് ഫോമിലേക്ക് ഉയര്ന്നതുമാണ് കേരളത്തിന് വിജയം നല്കിയത്. ആദ്യം ബാറ്റ് ചെയ്ത ഉത്തരാഖണ്ഡ് നായകന് ജെയ് ബിസ്തയുടെ മികവിലാണ് 200 കടന്നത്. ബിസ്ത 93 റണ്സ് എടുത്തു. മധ്യനിരയില് നേഗി 52 റണ്സെടുത്തു. മികച്ച രീതിയില് പന്തെറിഞ്ഞ എം.ഡി. നിധീഷ് മൂന്ന് വിക്കറ്റുകള് വീഴ്ത്തി. കഴിഞ്ഞ മത്സരങ്ങളിലും നിധീഷ് വിക്കറ്റുകള് വീഴ്ത്തിയിരുന്നു.
മറുപടി ബാറ്റിങ്ങിനിറങ്ങിയ കേരളത്തിന് കരുത്തായത് സച്ചിന് ബേബിയുടെ ബാറ്റിങ് മികവാണ്. 83 റണ്സെടുത്ത സച്ചിന് ബേബി പുറത്താകാതെ കേരളത്തെ വിജയത്തിലേക്കെത്തിച്ചു. നായകന് സഞ്ജു സാംസണ് (33), വിഷ്ണു വിനോദ് (34), വിനൂപ് മനോഹരന് (28) എന്നിവര് മികച്ച പിന്തുണ നല്കി. ഓപ്പണര് രോഹന് കുന്നുമല് 26 റണ്സ് നേടി.
