തിരുവനന്തപുരം: ബസ് ചാര്ജ് വര്ധനയുമായി ബന്ധപ്പെട്ട് വിദ്യാര്ഥി സംഘടനകളുമായി ഗതാഗത, വിദ്യാഭ്യാസ മന്ത്രിമാര് ഇന്ന് ചര്ച്ച നടത്തും. ബസ് ചാര്ജ് കൂട്ടാന് തീരുമാനിച്ചെങ്കിലും എത്ര രൂപ കൂട്ടണം, കണ്സഷന് നിരക്ക് കൂട്ടണമോ എന്നതില് അടക്കം അന്തിമ തീരുമാനമായിട്ടില്ല. ഈ സാഹചര്യത്തിലാണ് വിദ്യാര്ഥി സംഘടനകളുമായും ചര്ച്ച നടത്തുന്നത്.
വിദ്യാര്ഥികളുടെ കണ്സഷന് ഒരു രൂപയില് നിന്ന് ആറ് രൂപയാക്കണമെന്നാണ് ബസുടമകളുടെ പ്രധാന ആവശ്യം. എന്നാല് ഇത്ര വര്ധന പറ്റില്ലെന്നും ഒന്നര രൂപയാക്കാമെന്നുമാണ് സര്ക്കാര് നിലപാട്. ബസ് ചാര്ജ് വര്ധനയെ കുറിച്ച് പഠിച്ച ജസ്റ്റിസ് രാമചന്ദ്രന് കമ്മിഷന് മിനിമം കണ്സഷന് നിരക്ക് അഞ്ച് രൂപയാക്കണമെന്ന ശുപാര്ശയാണ് നല്കിയിട്ടുള്ളത്.
ബസ് മിനിമം നിരക്ക് 8 രൂപയില് നിന്ന് 10 രൂപ ആക്കണമെന്നാണ് സര്ക്കാരിന്റെ നിലപാട്. 12 രൂപയാണ് ബസ് ഉടമകള് ആവശ്യപ്പെടുന്ന വര്ധന. എങ്കിലും കടുംപിടിത്തം ഉണ്ടാകില്ലെന്നാണ് സൂചന. സെക്രട്ടേറിയേറ്റ് അനക്സ് ലയം ഹാളില് വൈകിട്ട് 4 മണിക്കാണ് ചര്ച്ച നടക്കുന്നത്. ചാര്ജ് വര്ധന അനുവദിക്കില്ലെന്നാണ് വിദ്യാര്ത്ഥി സംഘടന പ്രതിനിധികളുടെ നിലപാട്.
