മലപ്പുറം: കര്‍ണാടകത്തില്‍ ക്രഷര്‍ ബിസിനസില്‍ പങ്കാളിത്തം വാഗ്ദാനം ചെയ്ത് പി.വി. അന്‍വര്‍ എംഎല്‍എ പ്രവാസിയില്‍ നിന്ന് 50 ലക്ഷം തട്ടിയ കേസില്‍ ഡിസംബര്‍ 31ന് അന്തിമ അന്വേഷണ റിപ്പോര്‍ട്ട് സമര്‍പ്പിക്കുമെന്ന് ക്രൈംബ്രാഞ്ച് കോടതിയില്‍. അന്വേഷണ ഉദ്യോഗസ്ഥനായ മലപ്പുറം ക്രൈംബ്രാഞ്ച് ഡിവൈഎസ്പി പി.
വിക്രമനാണ്മഞ്ചേരി ചീഫ് ജുഡീഷ്യല്‍ മജിസ്ട്രേറ്റ് കോടതിയില്‍ സത്യവാങ്മൂലം നല്‍കിയത്. ക്രഷര്‍ സ്ഥിതി ചെയ്യുന്ന മംഗലാപുരം ബല്‍ത്തങ്ങാടിയില്‍ പോയുള്ള അന്വേഷണം ഇതിനകം പൂര്‍ത്തീകരിക്കുമെന്നും വ്യക്തമാക്കുന്നുണ്ട്. അന്വേഷണം കോടതിയുടെ മേല്‍നോട്ടത്തിലാക്കിയിട്ടും പുരോഗതിയില്ലാത്തതിനെത്തുടര്‍ന്ന് അന്വേഷണ ഉദ്യോഗസ്ഥന്‍ നേരിട്ട് ഹാജരാകണമെന്ന് മഞ്ചേരി ചീഫ് ജുഡഷ്യല്‍ മജിസ്ട്രേറ്റ് എസ്. രശ്മി ഉത്തരവിട്ടതിനാലാണ് ഡിവൈഎസ്പി ഇന്നലെ ഹാജരായത്.
ദുബായ്‌യില്‍ നിന്നെത്തിയ പരാതിക്കാരന്‍ മലപ്പുറം പട്ടര്‍ക്കടവ് സ്വദേശി നടുത്തൊടി സലീമും കോടതിയിലെത്തിയിരുന്നു. ഹൈക്കോടതി ഉത്തരവ് പ്രകാരം അന്വേഷണം ആരംഭിച്ച് രണ്ടര വര്‍ഷം കഴിഞ്ഞിട്ടും പ്രതിയായ പി.വി. അന്‍വര്‍ എംഎല്‍എയെ അറസ്റ്റ് ചെയ്യാതെ ക്രൈം ബ്രാഞ്ച് അന്വേഷണം അട്ടിമറിക്കുകയാണെന്നാരോപിച്ച് പരാതിക്കാരന്‍ സമര്‍പ്പിച്ച ഹര്‍ജിയില്‍ കഴിഞ്ഞ ആഗസ്ത് 11നാണ് കേസ് അന്വേഷണം മഞ്ചേരി ചീഫ് ജുഡീഷ്യല്‍ മജിസ്ട്രേറ്റ് കോടതിയുടെ മേല്‍നോട്ടത്തിലാക്കിയത്. എല്ലാ രണ്ടാഴ്ചയും അന്വേഷണ പുരോഗതി കോടതിയെ അറിയിക്കാനും ക്രൈംബ്രാഞ്ചിനോട് കോടതി നിര്‍ദേശിച്ചിരുന്നു.
കര്‍ണാടകത്തില്‍പോയി അന്വേഷിക്കാന്‍ കൊവിഡ് നിയന്ത്രണങ്ങള്‍ തടസമാണെന്നായിരുന്നു ക്രൈംബ്രാഞ്ചിന്റെ ആദ്യ റിപ്പോര്‍ട്ട്. ഒരു വര്‍ഷം മുമ്പ് 2020 ഏപ്രിലില്‍ മലപ്പുറം ക്രൈംബ്രാഞ്ച് എസ്പി, ക്രൈം ബ്രാഞ്ച് മേധാവിക്ക് നല്‍കിയ റിപ്പോര്‍ട്ടില്‍, ഡിവൈഎസ്പി കര്‍ണാടകയില്‍ പോയി രേഖകളും തെളിവുകളും ശേഖരിച്ചതായും അവ ഇംഗ്ലീഷിലേക്ക് മൊഴിമാറ്റിയതായും വ്യക്തമാക്കിയിരുന്നു. ഈ റിപ്പോര്‍ട്ടിന്റെ പകര്‍പ്പ് സലീമിന്റെ അഭിഭാഷകന്‍ ഹാജരാക്കിയതോടെ ക്രൈംബ്രാഞ്ച് റിപ്പോര്‍ട്ട് തള്ളിയ കോടതി സമ്പൂര്‍ണ കേസ് ഡയറി ഹാജരാക്കാന്‍ ഉത്തരവിടുകയായിരുന്നു. പോലീസ് അന്വേഷണത്തിന്റെ കേസ് ഡയറിയാണ് ക്രൈംബ്രാഞ്ച് ഹാജരാക്കിയത്. ഇതിനു പകരം ക്രൈംബ്രാഞ്ചിന്റെ കേസ് ഡയറി ഹാജരാക്കാന്‍ കോടതി കര്‍ക്കശ നിര്‍ദേശം നല്‍കി. ഇതോടെ പി.വി. അന്‍വര്‍ എംഎല്‍എ പ്രഥമദൃഷ്ട്യാ വഞ്ചനനടത്തിയതായി കാണിച്ച് ക്രൈംബ്രാഞ്ച് സപ്തംബര്‍ 30ന് കോടതിയില്‍ റിപ്പോര്‍ട്ട് സമര്‍പ്പിച്ചിരുന്നു.
