ഇടുക്കി: ജില്ലയില് കനത്ത മഴ തുടരുന്നു. ഇടുക്കി ഡാം ഇന്ന് ഉച്ചയോടെ തുറക്കും. ഉച്ചയ്ക്ക് രണ്ട് മണിക്ക് ഒരു ഷട്ടറാണ് 40 സെന്റിമീറ്റര് ഉയര്ത്തുക. പെരിയാര് തീരത്തുള്ളവര് ജാഗ്രത പാലിക്കണമെന്ന് ജില്ലാ ഭരണകൂടം അറിയിച്ചു.
ഇടുക്കിയിലെ ജലനിരപ്പ് നിലവില് 2398.80 അടിയാണ്. ജലനിരപ്പ് ഉയര്ന്ന പശ്ചാത്തലത്തില് ചെറുതോണി ഡാമിന്റെ ഷട്ടറുകള് ഉയര്ത്തണോ എന്ന കാര്യത്തില് ചര്ച്ചകള് നടത്തിയിരുന്നു. ഇതിന്റെ അടിസ്ഥാനത്തിലാണ് ഒരു ഷട്ടര് തുറക്കാന് തീരുമാനിച്ചത്.
റൂള് കര്വ് പ്രകാരം ഇടുക്കി ഡാമിലെ ബ്ലൂ അലര്ട്ട് ലെവല് 2392.03 അടിയാണ്. ഓറഞ്ച് അലര്ട്ട് 2398.03 അടിയും റെഡ് അലര്ട്ട് 2399.03 അടിയുമാണ്. റെഡ് അലര്ട്ട് ലെവലിലെത്തിയ ശേഷം ഇടുക്കി തുറന്നാല് മതിയെന്നാണ് കെഎസ്ഇബി ഇന്നലെ തീരുമാനിച്ചിരുന്നത്. എന്നാല് ഡാമിന്റെ വൃഷ്ടിപ്രദേശത്ത് മഴ കനക്കുകയും, മുല്ലപ്പെരിയാര് സ്പില് വേ ഷട്ടറുകള് തുറക്കേണ്ട സ്ഥിതിയുമുണ്ടായി. ചെറുതോണി ഷട്ടറുകള് തുറന്ന് സെക്കന്റില് ഒരു ലക്ഷം ലിറ്റര് വെള്ളം പുറത്തേക്ക് ഒഴുക്കാന് ഇന്നലെത്തന്നെ കളക്ടര് അനുമതി നല്കിയിരുന്നു.
