ന്യൂദല്‍ഹി:ആഗോള അംഗീകാരത്തിന്റെയും സ്വീകാര്യതയുടെയും കാര്യത്തില്‍ യുഎസ് പ്രസിഡന്‍റിനെയും യുകെ, കാനഡ പ്രധാനമന്ത്രിമാരെയും പിന്തള്ളി പട്ടികയില്‍ ഒന്നാമനായി പ്രധാനമന്ത്രി നരേന്ദ്ര മോദി.
‘ദ മോണിങ് കണ്‍സള്‍ട്ട്’ നടത്തിയ സര്‍വേയില്‍ 70 ശതമാനത്തോളമാണ് മോദിയുടെ അംഗീകാരം. മെക്സിക്കന്‍ പ്രസിഡന്‍റ് ആന്ദ്രേസ് മാനുവല്‍ ലോപ്പസ് ഒബ്രഡോറാണ് രണ്ടാം സ്ഥാനത്തും ഇറ്റാലിയന്‍ പ്രധാനമന്ത്രി മരിയോ ഡ്രാഗി മൂന്നാം സ്ഥാനത്തും എത്തി. ഓരോ രാജ്യത്തു നിന്നുമുള്ള പ്രായപൂര്‍ത്തിയായ വ്യക്തികളുടെ അഭിപ്രായം കണക്കാക്കിയാണ് റാങ്കിംഗ് കണക്കാക്കിയത്. ഇന്ത്യയില്‍ നിന്ന് 2,126 പേരെ മോണിങ് കണ്‍സള്‍ട്ടന്‍റ് ഓണ്‍ലൈനായി അഭിമുഖം നടത്തിയിരുന്നു.
ജര്‍മ്മന്‍ ചാന്‍സലര്‍ ആംഗല മെര്‍ക്കലാണ് നാലാം സ്ഥാനത്ത്. യുഎസ് പ്രസിഡന്‍റ് ജോ ബൈഡന് ഏഴാം സ്ഥാനമേയുള്ളൂ. ആസ്ത്രേല്യന്‍ പ്രധാനമന്ത്രി സ്‌കോട്ട് മോറിസണ്‍ അഞ്ചാം സ്ഥാനത്തും കാനഡ പ്രധാനമന്ത്രി ട്രൂഡോ ആറാം സ്ഥാനത്തുമാണ്. യുകെ പ്രധാനമന്ത്രി ബോറിസ് ജോണ്സണ് പത്താം സ്ഥാനമേയുള്ളൂ. ബ്രസീല്‍ പ്രസിഡന്‍റ് ജെയ്ര്‍ ബോള്‍സോനാരോ പട്ടികയില്‍ 13ാം സ്ഥാനത്താണ്.
അമേരിക്കന്‍ ഡാറ്റാ ഇന്‍റലിജന്‍സ് സ്ഥാപനമാണ് മോര്‍ണിംഗ് കണ്‍സള്‍ട്ട്. ഇവര്‍ ആസ്ട്രേലിയ, ബ്രസീല്‍, കാനഡ, ഫ്രാന്‍സ്, ജര്‍മ്മനി, ഇന്ത്യ, ഇറ്റലി, ജപ്പാന്‍, മെക്സിക്കോ, ദക്ഷിണ കൊറിയ, സ്പെയിന്‍, യുണൈറ്റഡ് കിംഗ്ഡം, യുണൈറ്റഡ് സ്റ്റേറ്റ്സ് എന്നിവിടങ്ങളിലെ മുന്‍നിര നേതാക്കളുടെ അംഗീകാരം, സ്വീകാര്യത എന്നിവയിലുള്ള റേറ്റിംഗ് കണക്കാക്കിയശേഷമാണ് മോദിയെ ഒന്നാമനായി തെരഞ്ഞെടുത്തത്. മോദി പട്ടികയില്‍ ഒന്നാമനായ കാര്യം നേരത്തെ കേന്ദ്രമന്ത്രി പിയൂഷ് ഗോയലാണ് സമൂഹമാധ്യമമായ ‘കൂ’ (KOO) വിലൂടെ വെളിപ്പെടുത്തിയിരുന്നു.
ഇതിന് മുന്‍പും മോദി ഈ പട്ടികയില്‍ ഒന്നാമതെത്തിയിട്ടുണ്ട്.
ലോകനേതാക്കളുടെ പട്ടികയില്‍ വിവിധ നേതാക്കള്‍ നേടിയ റേറ്റിംഗ് ശതമാനം :
1.നരേന്ദ്ര മോദി: 70%
2.ലോപ് ഒബ്രഡര്‍: 66%
3.മരിയോ ഡ്രാഗി: 58%
4.ആംഗല മെര്‍ക്കല്‍: 54 %
5.സ്‌കോട്ട് മോറിസണ്‍: 47 %
6.ജസ്റ്റിന്‍ ട്രൂഡോ: 45 %
7.ജോ ബൈഡന്: 44 %
8.ഫ്യൂമിയോ കിഷിഡ: 42 %
9.മൂണ്‍ ജെ-ഇന്‍: 41%
10.ബോറിസ് ജോണ്സണ്: 40%
11.പെഡ്രോ സാഞ്ചസ്: 37%
12.ഇമ്മാനുവല്‍ മാക്രോണ്‍: 36%
13.ജെയര്‍ ബോള്‍സോനാരോ: 35 %
