ഇടുക്കി : മുല്ലപ്പെരിയാര് സ്പില്വേ തുറന്നതിന് ശേഷം സ്ഥിതിഗതികള് വിലയിരുത്താന് ഇന്ന് അണക്കെട്ട് പരിശോധിക്കും. ജലനിരപ്പ് ഉയര്ന്നതിനെ തുടര്ന്നതിന്റെ പശ്ചാത്തലത്തില് സുപ്രീംകോടതി നിയോഗിച്ച മേല്നോട്ട സമിതിയുടെ ഉപസമിതിയാണ് പരിശോധിക്കുന്നത്. രാവിലെ പത്ത് മണിയോടെയാണ് സംഘം അണക്കെട്ട് പരിശോധിക്കുക.
കേന്ദ്ര ജലക്കമ്മിഷന് എക്സിക്യൂട്ടീവ് എഞ്ചിനീയര് ശരവണ കുമാര് അധ്യക്ഷനായ സമിതിയിയാണ് പരിശോധന നടത്തുക. ജലവിഭവ വകുപ്പിലെ എന്.എസ്. പ്രസീദ്, ഹരികുമാര് എന്നീ കേരളത്തിന്റെ പ്രതിനിധികളും തമിഴ്നാടിനെ പ്രതിനിധീകരിച്ച് പൊതുമരാമത്ത് വകുപ്പ് ഉദ്യോഗസ്ഥരായ സാം ഇര്വിന്, കുമാര് എന്നിവരും സമിതിയില് ഉള്പ്പെടും. അണക്കെട്ടിലെ സ്പില്വേ ഷട്ടര് അടയ്ക്കുന്ന കാര്യത്തില് തമിഴ്നാട് ഇന്ന് തീരുമാനം കൈക്കൊണ്ടേക്കും.
അതേസമയം സ്പില്വേ വഴി വെള്ളം തുറന്ന് വിട്ടതിനൊപ്പം അണക്കെട്ടിലേക്കുള്ള നീരൊഴുക്കും കുറഞ്ഞതോടെ ജലനിരപ്പ് കുറയുന്നുണ്ട്. 138.15 അടിയാണ് മുല്ലപ്പെരിയാറിലെ ഇപ്പോഴത്തെ ജലനിരപ്പ്. സ്പില്വേ വഴി പുറത്തേക്ക് ഒഴുകുന്ന വെള്ളത്തിന്റെ അളവ് ചെറിയ തോതില് കുറഞ്ഞിട്ടുണ്ട്. സെക്കന്ഡില് 2164 ഘനയടി വെള്ളമാണ് ഇപ്പോള് പുറത്തേക്ക് ഒഴുകുന്നത്.
സംസ്ഥാനത്ത് ചൊവ്വാഴ്ചയും ബുധനാഴ്ചയും ശക്തമായ മഴയ്ക്ക് സാധ്യതയെന്ന് കാലാവസ്ഥാ നിരീക്ഷണ കേന്ദ്രവും മുന്നറിയിപ്പ് നല്കി. ബംഗാള് ഉള്ക്കടലിലെ ന്യൂനമര്ദ്ദം നിലവില് ശ്രീലങ്കയ്ക്കും കന്യാകുമാരിക്കും ഇടയിലെ ന്യൂനമര്ദ്ദം ബുധനാഴ്ചയോടെ അറബിക്കടലിലേക്ക് എത്തുമെന്നാണ് വിലയിരുത്തല്. ഇതിനെ തുടര്ന്ന് തിരുവനന്തപുരം മുതല് ഇടുക്കി വരെയുള്ള ഏഴ് ജില്ലകളില് ഇന്നും നാളെയും ഓറഞ്ച് അലര്ട്ട് പ്രഖ്യാപിച്ചിരിക്കുകയാണ്. തൃശ്ശൂര്, മലപ്പുറം, കോഴിക്കോട്, വയനാട് ജില്ലകളില് യെല്ലോ അലര്ട്ടായിരിക്കും. വ്യാഴാഴ്ച വരെ മഴ തുടര്ന്നേക്കും. ഇടിമിന്നലിനും ശക്തമായ കാറ്റിനും സാധ്യതയുണ്ട്. മത്സ്യതൊഴിലാളികള് കടലില് പോകരുതെന്നും അറിയിപ്പുണ്ട്.
