കണ്ണൂര്‍: സിപിഎം സംസ്ഥാന സമിതിയംഗം പി. ജയരാജന് രൂപീകരിച്ച സന്നദ്ധ സംഘടനയായ ഐആര്‍പിസിയില്‍ സ്വാധീനമുറപ്പിക്കാന്‍ സിപിഎം നേതൃത്വം. സംഘടന രൂപീകരിച്ചതു മുതല്‍ ഐആര്‍പിസിയുടെ പ്രവര്‍ത്തനങ്ങള്‍ പൂര്‍ണ്ണമായും നിയന്ത്രിച്ചിരുന്നത് പി. ജയരാജന് തന്നെയായിരുന്നു.
പിണറായി ഉള്‍പ്പടെയുള്ള നേതൃത്വവുമായി അടുത്ത ബന്ധമുണ്ടായിരുന്ന ജയരാജന് ജില്ലാ സെക്രട്ടറിയായിരുന്ന കാലത്ത് പാര്‍ട്ടി നേരിട്ട് പ്രവര്‍ത്തനങ്ങളില്‍ ഇടപെട്ടിരുന്നില്ല. ഐആര്‍പിസിയുടെ ഉപദേശക സമിതി ചെയര്‍മാനായിരുന്നു ജയരാജനെങ്കിലും സംഘടനയുടെ ചെയര്‍മാനായി കാലങ്ങളായി പി. ജയരാജന്റെ ആശ്രിതരെയായിരുന്നു നിശ്ചയിച്ചിരുന്നത്. എന്നാല്‍, പാര്‍ട്ടി നേതൃത്വത്തിന് പി. ജയരാജന് അനഭിമതനാവുകയും ജില്ലാ സെക്രട്ടറി സ്ഥാനത്ത് നിന്ന് മാറ്റി നിര്‍ത്തപ്പെടുകയും ചെയ്ത ശേഷമാണ് ഐആര്‍പിസിയിയുടെ നിയന്ത്രണങ്ങളില്‍ നിന്ന് ജയരാജനെ ഘട്ടം ഘട്ടമായി മാറ്റി നിര്‍ത്താനുള്ള നീക്കം നടന്നത്. ഉപദേശക സമിതി ചെയര്‍മാനായി നിന്ന് ഐആര്‍പിസിയില്‍ കാലങ്ങളായി പി.ജയരാജന് പിന്‍സീറ്റ് ഡ്രൈവിങ്ങാണ് നടത്തിയതെന്നാണ് സിപിഎം നേതൃത്വത്തിന്റെ വിലയിരുത്തല്‍. മാത്രമല്ല ഐആര്‍പിസിയെ മുന്നില്‍ നിര്‍ത്തി പാര്‍ട്ടിയുടെ കണ്ണൂരിലെ നേതൃത്വത്തെ പോലും ഹൈജാക്ക് ചെയ്ത് പാര്‍ട്ടിയെ നിയന്ത്രിക്കുന്ന സ്ഥിതിയും ഉണ്ടായിരുന്നു.
കഴിഞ്ഞദിവസം കണ്ണൂര്‍ എകെജി ഹാളില്‍ നടത്തിയ ഐആര്‍പിസി വാര്‍ഷിക പൊതുയോഗത്തില്‍ സിപിഎം ജില്ലാ സെക്രട്ടറി എം.വി. ജയരാജന് നേരിട്ട് പങ്കെടുത്താണ് കാര്യപരിപാടികള്‍ നിയന്ത്രിച്ചത്. പുതിയ ഭാരവാഹികളെ നിശ്ചയിച്ചപ്പോള്‍ നേരത്തെ ചെയര്‍മാനായിരുന്ന പി.എം. സാജിദിനെ വൈസ് ചെയര്‍മാനാക്കി. സിപിഎം ജില്ലാ സെക്രട്ടേറിയറ്റ് അംഗവും മുന്‍ എംഎല്‍എയുമായ എം. പ്രകാശനാണ് പുതിയ ചെയര്‍മാന്‍. ജില്ലാ സെക്രട്ടറി എം.വി. ജയരാജന്റെ ഇഷ്ടക്കാരനായ ടി.ഐ. മധുസൂദനനെ ഉപദേശക സമിതിയംഗമായും തെരഞ്ഞെടുത്തിട്ടുണ്ട്. ഐആര്‍പിസിയുടെ ചുമതലയിലുള്ളവരില്‍ പലരും പി. ജയരാജന്റെ ഇഷ്ടക്കാരാണെന്ന് നേരത്തെ തന്നെ ആരോപണമുയര്‍ന്നിരുന്നു.
സംഘടനാ ചുമതലയില്‍ നിന്ന് മാറ്റി നിര്‍ത്തപ്പെട്ട പി. ജയരാജന് ഐആര്‍പിസിയില്‍ മാത്രമായിരുന്നു സ്വാധീനമുണ്ടായിരുന്നത്. ഇപ്പോള്‍ ഐആര്‍പിസിയില്‍ നിന്നും മാറ്റി നിര്‍ത്താനുള്ള നീക്കമാണ് നടത്തുന്നതെന്ന ആരോപണം ഉയര്‍ന്നു കഴിഞ്ഞു. ഐആര്‍പിസി ചെയര്‍മാനായി എം. പ്രകാശനെ തെരഞ്ഞെടുത്തതിലും ചെയര്‍മാനായിരുന്ന പി.എം. സാജിദിനെ തരംതാഴ്‌ത്തിയതിലും അണികള്‍ക്കിടിയില്‍ പ്രതിഷേധമുയര്‍ന്നിട്ടുണ്ട്. പ്രതിഷേധം നവമാധ്യമങ്ങളിലൂടെയാണ് ഇവര്‍ പ്രകടിപ്പിച്ചിരിക്കുന്നത്. സാജിദിന്റെ പ്രവര്‍ത്തനങ്ങള്‍ അക്കമിട്ട് നിരത്തുന്നതാണ് കുറിപ്പ്.
