ന്യൂദല്‍ഹി : മലദ്വാരത്തിലൂടെ സ്വര്‍ണ്ണം കടത്താന്‍ ശ്രമം മലയാളി മണിപ്പൂരില്‍ പിടിയില്‍. കോഴിക്കോട് സ്വദേശിയായ മുഹമ്മദ് ഷരീഫാണ് പിടിയിലായത്. ഇയാള്‍ സ്വര്‍ണം മിശ്രിത രൂപത്തിലാക്കി നാല് പായ്‌ക്കറ്റുകളിലാക്കി ഇംഫാല്‍ വിമാനത്താവളം വഴി കടത്താന്‍ ശ്രമിക്കുന്നതിനിടെ ഇയാള്‍ സിഐഎസ്എഫിന്റെ പിടിയിലാവുകയായിരുന്നു.
തിങ്കളാഴ്ച ഉച്ചയ്‌ക്ക് 2.40-നുള്ള ഇംഫാല്‍- ദല്‍ഹി എയര്‍ഇന്ത്യ വിമാനത്തിലാണ് ഷരീഫ് യാത്രചെയ്യേണ്ടിയിരുന്നത്. സുരക്ഷാപരിശോധനയ്‌ക്കിടെ സംശയംതോന്നി ഇയാളെ ചോദ്യംചെയ്യുകയായിരുന്നു. പരസ്പരവിരുദ്ധമായ മറുപടി നല്‍കിയതോടെ എക്സറേ പരിശോധനയ്‌ക്കും വിധേയനാക്കി. തുടര്‍ന്നാണ് മലദ്വാരത്തിനുള്ളില്‍ ഒളിപ്പിച്ചനിലയില്‍ സ്വര്‍ണം കണ്ടെത്തിയത്. 42 ലക്ഷ വിലമതിക്കുന്ന സ്വര്‍ണ്ണമാണ് ഇയാളില്‍ നിന്നും പിടിച്ചെടുത്തത്.
