ന്യൂദല്ഹി: മഹിളാ കോണ്ഗ്രസ് ദേശീയ അധ്യക്ഷയും മുന് എം.പിയുമായ സുഷ്മിതാ ദേവ് പാര്ട്ടി വിട്ടു. ബംഗാള് മുഖ്യമന്ത്രി മമത ബാനര്ജിയുടെ നേതൃത്വത്തിലുള്ള തൃണമൂല് കോണ്ഗ്രസില് ചേരാനാണ് തീരുമാനം. മമത ബാനര്ജിയെയും അനന്തരവന് അഭിഷേക് ബാനര്ജിയെയും കാണാന് അസമിലെ നേതാവ് സുഷ്മിത കൊല്ക്കത്തയിലാണ്. ‘അവര് ചേര്ന്നാല് അസമിലെ തൃണമൂലിന്റെ മുഖമായിരിക്കും – തൃണമൂല് കോണ്ഗ്രസ് വൃത്തങ്ങള് പറഞ്ഞു.
ഇന്ന് രാവിലെ തന്റെ ട്വിറ്റര് ഹാന്ഡിലിന്റെ ബയോയില് മുന് അംഗം എന്ന് രേഖപ്പെടുത്തിയതോടെയാണ് പാര്ട്ടി വിട്ടതായി വ്യക്തമായത്.പാര്ട്ടി വിടുകയാണെന്ന് അറിയിച്ചുകൊണ്ട് കോണ്ഗ്രസ് അധ്യക്ഷ സോണിയ ഗാന്ധിക്ക് എഴുതിയ കത്തിലും പാര്ട്ടി വിടുന്നതിന്റെ കാരണം സുഷ്മിതാ പറയുന്നില്ല. ഡല്ഹിയില് പീഡനത്തിനിരയായി മരിച്ച ഒന്പതുകാരിയുടെ മാതാപിതാക്കളുടെ ഫോട്ടോയുള്ള ചിത്രം ഇട്ടതിനെ തുടര്ന്ന് രാഹുല് ഗാന്ധിക്ക് ഒപ്പം സുഷ്മിതയുടെ അടക്കം ട്വിറ്റര് അക്കൗണ്ടിന് പൂട്ട് വീണിരുന്നു.
