കോഴിക്കോട് : നിയമസഭാ തെരഞ്ഞെടുപ്പില്‍ മത്സരിക്കാനായി സുരക്ഷിതമായ മണ്ഡലം നല്‍കിയില്ലെന്ന് മുസ്ലിം ലീഗിനെതിരെ കെ.എം. ഷാജിയുടെ വിമര്‍ശനം. സിപിഎം നിരന്തരം വേട്ടയാടിയിട്ടും അഴീക്കോട് മണ്ഡലത്തില്‍ തന്നെ മത്സരിപ്പിക്കാന്‍ നിര്‍ബന്ധിച്ചെന്നും കെ.എം. ഷാജി വിമര്‍ശിച്ചു. മുസ്ലിം ലീഗ് സംസ്ഥാന ഭാരവാഹികളുടെ യോഗത്തിലാണ് ഇത്തരത്തില്‍ വിമര്‍ശനം ഉയര്‍ത്തിയത്.
അഴീക്കോട് മണ്ഡലത്തില്‍ നിന്ന് ഇത്തവണ മത്സരിക്കാനില്ലെന്ന് നേരത്തെ വ്യക്തമാക്കിയതാണ്. അഴീക്കോട് നിന്നാണെങ്കില്‍ തോല്‍ക്കുമെന്നും ബോധ്യപ്പെടുത്തിയിരുന്നു. എന്നിട്ടും അവിടെ നിന്നുതന്നെ മത്സരിക്കാന്‍ നേതൃത്വം ആവശ്യപ്പെടുകയായിരുന്നെന്നും കെ.എം. ഷാജി കുറ്റപ്പെടുത്തി. മുതിര്‍ന്ന നേതാക്കളും ഇതില്‍ അദ്ദേഹത്തെ പിന്തുണച്ചു.
തെരഞ്ഞെടുപ്പിലെ ഷാജിയുടെ തോല്‍വി ലീഗിന് വലിയ തിരിച്ചടിയായി. ഇക്കാര്യത്തില്‍ വീഴ്ചയുണ്ടായെന്നും വിമര്‍ശനങ്ങള്‍ ഉള്‍ക്കൊള്ളുന്നുവെന്നും പി.കെ. കുഞ്ഞാലിക്കുട്ടി യോഗത്തില്‍ സമ്മതിച്ചതായാണ് സൂചന. അതേസമയം പാര്‍ട്ടിയുടെ അടിത്തട്ട് മുതല്‍ പ്രശ്നങ്ങളുണ്ടെന്ന് വിമര്‍ശനമുയര്‍ന്നു. അതുകൊണ്ട് താഴെത്തട്ടില്‍നിന്ന് പരിഹാരം തുടങ്ങണം. നേതാക്കള്‍ നിശ്ചയിക്കുന്നവരല്ല ഭാരവാഹികളാവേണ്ടത്. അങ്ങനെ തുടര്‍ന്നാല്‍ പാര്‍ട്ടിനേരിടുന്ന പ്രതിസന്ധി പരിഹരിക്കാന്‍ കഴിയില്ല. കോണ്‍ഗ്രസ് മാറ്റത്തിന് തയ്യാറായി. ലീഗും അത് മാതൃകയാക്കണം.
സംസ്ഥാന നേതൃത്വത്തിലേക്ക് കുഞ്ഞാലിക്കുട്ടിയുടെ തിരിച്ചുവരവ് അനിവാര്യമായിരുന്നു. പക്ഷേ തിരിച്ചുവന്ന രീതി ശരിയായില്ല. അദ്ദേഹം ഉപമുഖ്യമന്ത്രിയാവുമെന്നും ലീഗ് യുഡിഎഫ് സംവിധാനത്തില്‍ പിടിമുറുക്കുമെന്നുമുള്ള രീതിയില്‍ സിപിഎം പ്രചാരണം നടത്തിയപ്പോള്‍ അതിനെ പ്രതിരോധിക്കുന്നതില്‍ ലീഗ് പരാജയപ്പെട്ടു. അതുകൊണ്ടാണ് കുഞ്ഞാലിക്കുട്ടിയുടെ തിരിച്ചുവരവ് യുഡിഎഫിന് തന്നെ തിരിച്ചടിയായി മാറിയതെന്നും അഭിപ്രായമുയര്‍ന്നു.
യുഡിഎഫ് നേതൃത്വം ഇത്തവണ കെ.എം. മാണി വിഭാഗത്തെ കൈവിട്ടതും ശരിയായില്ല. അതും യുഡിഎഫിന്റെ തെരഞ്ഞെടുപ്പ് തോല്‍വിക്ക് കാരണമായെന്നും ലീഗ് നേതൃത്വം വിലയിരുത്തി. കെ.പി.എ. മജീദിനെ മാറ്റി പി.എം.എ. സലാമിനെ പാര്‍ട്ടി ജനറല്‍ സെക്രട്ടറിയാക്കിയ രീതി ശരിയായില്ലെന്നും വിമര്‍ശനമുണ്ടായി. സംസ്ഥാന കൗണ്‍സിലാണ് കെ.പി.എ. മജീദിനെ തെരഞ്ഞെടുത്തത്. അദ്ദേഹത്തെ മാറ്റി പുതിയ ആള്‍ക്ക് ചുമതല നല്‍കിയത് ഏതാനും നേതാക്കള്‍ മാത്രമെടുത്ത തീരുമാനമാണ്. അതുകൊണ്ട് കെ.പി.എ. മജീദിനെ ആ പദവിയില്‍ തിരിച്ചുകൊണ്ടുവരണം. അതിനുശേഷം പുതിയ ജനറല്‍ സെക്രട്ടറിയെ കൗണ്‍സില്‍ കൂടി തീരുമാനിക്കട്ടെയെന്നും പി.എം. സാദിഖലി ഉള്‍പ്പെടെയുള്ള നേതാക്കള്‍ ആവശ്യപ്പെട്ടു.
