രാജാക്കാട്: ഇടുക്കിയില്‍ പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ച കേസില്‍ പ്രതിയ്‌ക്ക് 35 വര്‍ഷം കഠിന തടവും 3,05,000 രൂപ പിഴയും. കുഞ്ചിത്തണ്ണി ആനച്ചാല്‍ തട്ടാത്തിമുക്ക് കുഴിപ്പള്ളില്‍ അനൂപ് ഹരിദാസി(28) നെയാണ് ഇടുക്കി അതിവേഗ പ്രത്യേക കോടതി ജഡ്ജി ടി.ജി വര്‍ഗീസ് ശിക്ഷിച്ചത്.
2016 മെയ് മാസത്തിലാണ് പ്രതി പെണ്‍കുട്ടിയെ വിവാഹ വാഗ്ദാനം നല്‍കി കൂട്ടികൊണ്ട് പോയി പീഡനത്തിനിരയാക്കിത്.
രാജാക്കാട് പോലീസിന് ലഭിച്ച പരാതിയുടെ അടിസ്ഥാനത്തിലാണ് പ്രതിയെ പിടികൂടിയത്. പിന്നീട് സിഐമാരായ ജെ. കുര്യാക്കോസ്, റ്റി.എ. യൂനിസ്, എസ്‌ഐ ജി. വിഷ്ണു, വനിതാ പോലീസ് ഓഫീസര്‍മാരായ ലൈജാമോള്‍, റ്റി.വി. ലേഖ എന്നിവരടങ്ങുന്ന പ്രത്യേക സംഘമാണ് കേസ് അന്വേഷിച്ചത്.
പെണ്‍കുട്ടിയെ പീഡനത്തിരയാക്കിയതിന് അടക്കമുള്ള വ്യക്തമായ തെളിവുകള്‍ പിന്നീട് ലഭിച്ചു. ഐപിസി 363 പ്രകാരം 5 വര്‍ഷം കഠിന തടവും 5000 രൂപയും, ഐപിസി 376 പ്രകാരം 10 വര്‍ഷ കഠിന തടവും 1 ലക്ഷം പിഴയും, പോക്‌സോ ആക്ട് പ്രകാരം 20 വര്‍ഷം കഠിന തടവും കൂടാതെ പെണ്‍കുട്ടിയുടെ കുടുംബത്തിന് 1 ലക്ഷം രൂപയുമാണ് വിധിച്ചത്. അതേ സമയം പ്രതിക്ക് 20 വര്‍ഷം കഠിന തടവ് അനുഭവിച്ചാല്‍ മതിയാകും. കേസില്‍ പ്രോസിക്യൂഷന് വേണ്ടി സ്‌പെഷ്യല്‍ പ്രോസിക്യൂട്ടര്‍ അഡ്വ. സനീഷ് എസ്.എസ്. ഹാജരായി.
കുട്ടികള്‍ക്കെതിരേ നിരധിയായ അധിക്രമങ്ങളും പീഡനങ്ങളും സംസ്ഥാനത്ത് റിപ്പോര്‍ട്ട് ചെയ്യുന്ന സാഹചര്യത്തില്‍ ഇത്തരം കേസുകളില്‍ കര്‍ശനമായ നിയമ നടപടി വരുന്നത് ആശ്വാസമാകുകയാണ്.
കഠിനമായ ശിക്ഷ ഉറപ്പാക്കുന്നത് ഇത്തരം കുറ്റ കൃത്യങ്ങള്‍ക്ക് തടയിടാന്‍ സാധിക്കുമെന്നാണ് പൊതുവെയുള്ള വിലയിരുത്തല്‍. അതേ സമയം കേസിലെ കാലതാമസം ഒഴുവാക്കണമെന്ന ആവശ്യവും ശക്തമാണ്.
