കുമളി: പെരിയാര്‍ കടുവാ സങ്കേതത്തിനുള്ളില്‍ ഉപേക്ഷിക്കപ്പെട്ട നിലയില്‍ കണ്ടെത്തിയ കടുവക്കുട്ടി മംഗള ഇന്ന് മുതല്‍ ഇരതേടല്‍ പരിശീലനത്തിന്റെ പുതിയ പാഠങ്ങളിലേക്ക്. കടുവക്കുട്ടിയെ പ്രത്യേകം സജ്ജീകരിച്ച കൂട്ടിലേയ്‌ക്ക് ഇന്ന് മുതല്‍ തുറന്നുവിടും. ഇതിനായി ഏകദേശം 10000 അടി വിസ്തീര്‍ണ്ണവും 22 അടി ഉയരവുമുള്ള കൂട് സജ്ജീകരിച്ചു കഴിഞ്ഞു. രാജ്യത്ത് തന്നെ ആദ്യമായാണ് ഒരു കടുവക്കുട്ടിക്ക് ഇരതേടല്‍ പരിശീലനം നല്‍കുന്നത്.
പ്രത്യേകമായി നിര്‍മിച്ച കൂട്ടില്‍ 24 മണിക്കൂറും ക്യാമറ നിരീക്ഷണവും ഏര്‍പ്പെടുത്തിയിട്ടുണ്ട്. കേരള- തമിഴ്നാട് അതിര്‍ത്തിയിലെ മംഗളാദേവി ക്ഷേത്രത്തിന് സമീപത്ത് നിന്നാണ് അവശനിലയില്‍ കഴിഞ്ഞ നവംബറില്‍ രണ്ട് മാസം പ്രായമുള്ള പെണ്‍ കടുവാക്കുട്ടിയെ കണ്ടെത്തുന്നത്. തള്ളയെ കണ്ടെത്താനുള്ള തുടര്‍ശ്രമങ്ങള്‍ വിജയിച്ചില്ല. പിന്നാലെ ഉന്നത വനംവകുപ്പ് ഉദ്യോഗസ്ഥരുടെ നിര്‍ദ്ദേശപ്രകാരം ദേശീയ കടുവ സംരക്ഷണ അതോറിറ്റിയുടെ (എന്‍ടിസിഎ) ചട്ടങ്ങള്‍ക്ക് അനുസരിച്ച് കടുവക്കുട്ടിയെ ഏറ്റെടുത്ത് സംരക്ഷിക്കുകയായിരുന്നു.
പരിശോധനയില്‍ പിന്‍കാലുകള്‍ക്ക് സ്വാധീനക്കുറവും കാഴ്‌ച്ചശക്തിക്കുറവും കണ്ടെത്തിയതോടെ വിദഗ്ധചികിത്സയും പരിചരണവും നല്‍കി. ഡോക്ടര്‍മാരായ ശ്യാം ചന്ദ്രന്‍, ഡോ. നിഷ, ഡോ. സിബി എന്നിവരാണ് പരിചരണം നല്‍കി വരുന്നത്. 9 മാസം പ്രായമായ കടുവക്കുട്ടി ഇപ്പോള്‍ പൂര്‍ണ്ണ ആരോഗ്യവതിയായി എന്ന് അസിസ്റ്റന്റ് ഫോറസ്റ്റ് വെറ്റിനറി ഓഫീസര്‍ ഡോ. അനുരാജ് സ്ഥിരികരിച്ചു. പെരിയാര്‍ കടുവ സങ്കേതം ഫീല്‍ഡ് ഡയറക്ടറുടെ അധ്യക്ഷതയിലുള്ള വിദഗ്ധസമിതിയുടെ തീരുമാനം അനുസരിച്ച് ആണ് നടപടിയെന്ന് ഈസ്റ്റ് ഡിവിഷന്‍ ഡെപ്യൂട്ടി ഡയറക്ടര്‍ എ.പി. സുനില്‍ബാബു പറഞ്ഞു.
വനത്തില്‍ ഉപേക്ഷിക്കപ്പെട്ട നിലയില്‍ കണ്ടെത്തിയപ്പോള്‍ രണ്ടര കിലോ മാത്രം ഭാരമുണ്ടായിരുന്ന മംഗള ഇപ്പോള്‍ നാല്‍പ്പത് കിലോയോളമായി. പൂര്‍ണമായും കാടിന്റെ അന്തരീക്ഷത്തിലേക്ക് മാറ്റുന്നതിന്റെ ഭാഗമായി ഇനി മുതല്‍ മനുഷ്യ സാമീപ്യം ഇല്ലാതാക്കിയുള്ള നിരീക്ഷണമായിരിക്കും നടത്തുകയെന്നും അധികൃതര്‍.
