തിരുവനന്തപുരം: കോവിഡ് മൂന്നാം തരംഗം ഉണ്ടായാല് അത് കുട്ടികളെ കൂടുതലായി ബാധിക്കുമെന്ന വിശ്വാസത്തിന് വലിയ ശാസ്ത്രീയ അടിത്തറയില്ലന്ന് മുഖ്യമന്ത്രി പിണറായി വിജയന്.. ഇതിനകം കേവലം 4% കുട്ടികളെ മാത്രമാണ് രോഗം ബാധിച്ചിട്ടുള്ളത്. കുട്ടികളിലെ മരണ നിരക്കും വളരെ കുറവാണ്. എങ്കിലും മള്ട്ടി സിസ്റ്റം ഇന്ഫ്ളമേറ്ററി സിന്ഡ്രം എന്ന ഗുരുതരമായ കോവിഡാനന്തര രോഗസാധ്യത കുട്ടികളില് കാണുന്ന സാഹചര്യം പരിഗണിച്ച് കുട്ടികളുടെ ചികിത്സക്കാവശ്യമായ തീവ്രപരിചരണ സംവിധാനം ഒരുക്കുകയാണെന്നും മുഖ്യമന്ത്രി പറഞ്ഞു.
കോവിഡ് ബാധിച്ചാല് ഏറ്റവുമധികം ഗുരുതരമാകാന് സാധ്യതയുള്ളവരാണ് ഗര്ഭിണികള്. സംസ്ഥാനത്ത് തന്നെ കോവിഡ് ബാധിച്ച് നിരവധി ഗര്ഭിണികള് ഗുരുതരാവസ്ഥയിലാകുകയും ചിലര് മരണമടയുകയും ചെയ്തിട്ടുണ്ട്. പലതരം പരീക്ഷണ നിരീക്ഷണങ്ങള്ക്കൊടുവിലാണ് കേന്ദ്ര ആരോഗ്യ മന്ത്രാലയം ഗര്ഭിണികള്ക്ക് വാക്സിന് നല്കാന് തീരുമാനിച്ചത്. അതുകൊണ്ട് വാക്സിന്റെ സുരക്ഷിതത്വത്തിന്റെ കാര്യത്തില് ആശങ്ക കൂടാതെ വാക്സിന് സ്വീകരിക്കാന് തയ്യാറാകണം.
സംസ്ഥാനത്ത് ഇതുവരെ നാല്പതിനായിരത്തോളം ഗര്ഭിണികളാണ് വാക്സിന് എടുത്തത്. എന്നാല് ചിലര് വാക്സിനെടുക്കാന് വിമുഖത കാണിക്കുന്നുണ്ട്. ഗര്ഭിണികള് സ്വന്തം സുരക്ഷയും കുഞ്ഞിന്റെ സുരക്ഷയും കണക്കിലെടുത്ത് വാക്സിന് എടുക്കേണ്ടതാണ്. മുഖ്യമന്ത്രി പറഞ്ഞു
