കൊച്ചി : മദ്യപിച്ച് ഉപദ്രവം ഉണ്ടാക്കിയിരുന്ന മകനെ അച്ഛന്‍ കുത്തിക്കൊന്നു. ഉദയംപേരൂര്‍ ഞാറ്റിയേല്‍ സന്തോഷാണ്(42) കൊല്ലപ്പെട്ടത്. ഇയാളുടെ അച്ഛനായ സോമനെ പോലീസ് കസ്റ്റഡിയിലെടുത്തു. സന്തോഷ് മദ്യപിച്ചെത്തി സ്ഥിരമായി ഇയാളെ മര്‍ദ്ദിച്ചിരുന്നു. ഇരുവരും മാത്രമാണ് ഈ വീട്ടില്‍ താമസിച്ചിരുന്നത്.
മകന്‍ സ്ഥിരമായി മദ്യപിച്ചെത്തി മര്‍ദ്ദിക്കുന്നതിനാല്‍ കുറേ നാളുകളായി സോമന്‍ മകളുടെ വീട്ടിലായിരുന്നു. കാന്‍സര്‍ രോഗബാധിതനായ സോമന്‍ ഈയിടെയാണ് വീട്ടിലേക്ക് മടങ്ങിയെത്തിയത്. വെള്ളിയാഴ്ച ഉച്ചയോടെ മദ്യപിച്ച് വീട്ടിലെത്തിയ സന്തോഷ് തന്നെ മര്‍ദ്ദിച്ചതായി സോമന്‍ പറയുന്നു.
രാത്രി 12 മണിയോടെയാണ് കൊലപാതകം നടക്കുന്നത്. കത്തിയെടുത്ത് സോമന്‍, സന്തോഷിനെ കുത്തുകയായിരുന്നു. അയല്‍വാസികള്‍ എത്തിയപ്പോള്‍ കുത്തേറ്റ് കിടക്കുന്ന സന്തോഷിനെയാണ് കണ്ടത്. പോലീസ് എത്തിയപ്പോഴേക്കും മരണം സംഭവിച്ചിരുന്നു.
