തിരുവനന്തപുരം : മുന്‍ മുഖ്യമന്ത്രി ഉമ്മന്‍ചാണ്ടിയെ അപകീര്‍ത്തിപ്പെടുത്താന്‍ ശ്രമിച്ചെന്ന കേസില്‍ കെ.ബി.ഗണേഷ്‌കുമാറിനും സോളര്‍ കേസ് പ്രതി സരിത എസ്. നായര്‍ക്കുമെതിരെ കേസെടുത്തു. വ്യാജതെളിവുകള്‍ ഹാജരാക്കി അപകീര്‍ത്തിപ്പെടുത്താന്‍ ശ്രമിച്ചെന്ന കേസില്‍ കൊട്ടാരക്കര ഒന്നാം ക്ലാസ് മജിസ്‌ട്രേട്ട് കോടതിയാണ് കേസെടുത്തിരിക്കുന്നത്.
മുന്‍ മുഖ്യമന്ത്രി ഉമ്മന്‍ചാണ്ടിക്കും പ്രമുഖര്‍ക്കും എതിരെ 25 പേജുള്ള കത്ത് സരിത എസ്. നായര്‍ ജുഡീഷ്യല്‍ കമ്മിഷനു നല്‍കിയിരുന്നു. കത്തിനു പിന്നില്‍ ഗൂഢാലോചനയുണ്ടെന്നു കാണിച്ച് കോണ്‍ഗ്രസ് നേതാവ് കൂടിയായ അഡ്വ. സുധീര്‍ ജേക്കബ്, അഡ്വ.ജോളി അലക്‌സ് എന്നിവര്‍ ഫയല്‍ ചെയ്ത കേസിലാണ് നടപടി. കൃത്രിമ രേഖ ചമയ്‌ക്കല്‍, ഗൂഢാലോചന എന്നീ കുറ്റങ്ങളാണ് ചുമത്തിയത്. പ്രഥമദൃഷ്ട്യാ ഇരുവര്‍ക്കുമെതിരെ തെളിവുണ്ടെന്നും സമന്‍സ് അയയ്‌ക്കാനും കോടതി നിര്‍ദ്ദേശിച്ചു. കേസ് അടുത്ത മാസം 30നു വീണ്ടും പരിഗണിക്കും.
സോളര്‍ കേസില്‍ അറസ്റ്റിലായി പത്തനംതിട്ട ജയിലില്‍ കഴിഞ്ഞപ്പോള്‍ എഴുതിയ കത്താണ് സരിത ജുഡീഷ്യല്‍ അന്വേഷണ കമ്മീഷന് കൈമാറിയത്. അതേസമയം ജയിലില്‍ വച്ച് എഴുതിയ കത്തില്‍ 21 പേജാണ് ഉണ്ടായിരുന്നതെന്നും പിന്നീട് 4 പേജ് കൂട്ടിച്ചേര്‍ത്തെന്നും ആരോപണമുണ്ട്.
ഉമ്മന്‍ചാണ്ടിയെ അടക്കമുള്ള പ്രമുഖരെ കേസില്‍ ഉള്‍പ്പെടുത്താനുള്ള ഗൂഢശ്രമമാണ് കത്തിന് പിന്നില്‍ ഉള്ളത്. ഇവരുടെ രാഷ്‌ട്രീയ ഭാവി തകര്‍ക്കാനുള്ള നീക്കമാണ്. കെ.ബി. ഗണേഷ്‌കുമാറിന്റെ അറിവോടെ പിഎ പ്രദീപ്കുമാറും ഗണേഷിന്റെ ബന്ധു ശരണ്യ മനോജും കൊട്ടാരക്കര കേന്ദ്രീകരിച്ചു ഗൂഢാലോചനയാണ് ഇതിന് പിന്നില്‍. ഉമ്മന്‍ചാണ്ടിയുടേത് ഉള്‍പ്പെടെയുള്ള പേരുകള്‍ രണ്ടാമത് എഴുതി ചേര്‍ത്തതാണെന്നും ഇതില്‍ ആരോപിക്കുന്നുണ്ട്.
21 പേജുള്ള കത്ത് സരിതയുടെ അന്നത്തെ അഭിഭാഷകന്‍ ഫെന്നി ബാലകൃഷ്ണന് കൈമാറിയതിന്റെ രേഖകള്‍ ജയില്‍ സൂപ്രണ്ട് കോടതിയില്‍ ഹാജരാക്കിയിരുന്നു. ഉമ്മന്‍ചാണ്ടി അടക്കമുള്ളവരുടെ മൊഴിയും കോടതി രേഖപ്പെടുത്തിയിരുന്നതാണ്.
