തിരുവനന്തപുരം : വനിതാകമ്മീഷന് അധ്യക്ഷ സ്ഥാനത്ത് നിന്നും ജോസഫൈന് രാജിവെച്ചത് നില്ക്കക്കള്ളി ഇല്ലാത്തതുകൊണ്ടാണെന്ന് ബിജെപി സംസ്ഥാന പ്രസിഡന്റ് കെ.സുരേന്ദ്രന്. പരാതി പറയാന് വിളിച്ച ഇരയോട് മനുഷ്യത്വമില്ലാതെ സംസാരിച്ച വനിതാകമ്മീഷന് അധ്യക്ഷയ്ക്കെതിരെ ശക്തമായ രോഷമാണ് പൊതുജനങ്ങളില് നിന്നും ഉണ്ടായത്.
ജനങ്ങളില് നിന്നുള്ള പ്രതിഷേധം ശക്തമായതിനെ തുടര്ന്ന് പിടിച്ചുനില്ക്കാനാവാതെ വന്നതോടെയാണ് അവര്ക്ക് രാജിവെയ്ക്കേണ്ടി വന്നതെന്ന് സുരേന്ദ്രന് വിമര്ശിച്ചു. വനിതാകമ്മീഷനില് പാര്ട്ടി നേതാക്കളല്ല. സ്ത്രീകളുടെ പ്രശ്നങ്ങള് പരിഹരിക്കാന് കഴിവുള്ളവരാണ് വേണ്ടത്. ജോസഫൈന്റെ രാജിയെ ബിജെപി സ്വാഗതം ചെയ്യുന്നുവെന്നും സുരേന്ദ്രന് പറഞ്ഞു.
വനിതാ കമ്മിഷന് അധ്യക്ഷ സ്ഥാനത്തേക്ക് രാഷ്ട്രീയക്കാരല്ലാത്തവരെ പരിഗണിക്കണം. സ്ത്രീകള്ക്ക് വേണ്ടി നിസ്വാര്ത്ഥമായി പ്രവര്ത്തിക്കുന്ന ധാരാളം വനിതകള് കേരളത്തിലുണ്ട്. പാലക്കാട് പി.കെ. ശശിയുടെ വിഷയത്തില് ഉള്പ്പെടെ ജോസഫൈന് വിട്ടുവീഴ്ച ചെയ്യേണ്ടി വന്നത് സിപിഎം നേതാവായതു കൊണ്ടാണ്. വനിതകളുടെ ആത്മാഭിമാനം സംരക്ഷിക്കാനും അവര്ക്ക് ആരെയും പേടിക്കാതെ സമൂഹത്തില് ജീവിക്കാനും സാഹചര്യമൊരുക്കുന്നതില് കേരളത്തിലെ ഭരണസംവിധാനം പരാജയപ്പെട്ടെന്നും കെ. സുരേന്ദ്രന് കൂട്ടിച്ചേര്ത്തു.
