ജിദ്ദ: രാജ്യത്ത് യോഗയുടെ പ്രചാരത്തിനായി സഹകരണം വര്ധിപ്പിക്കാന് ഇന്ത്യയുമായി തിങ്കളാഴ്ച ധാരണാപത്രം ഒപ്പിട്ട് സൗദി അറേബ്യ. ആയുഷ് മന്ത്രാലയത്തിന് കീഴിലുള്ള മൊറാര്ജി ദേശായി നാഷണല് ഇന്സ്റ്റിറ്റ്യൂട്ട് ഓഫ് യോഗയുമായി സൗദി മിനിസ്ട്രി ഓഫ് സ്പോര്ട്സ് ലീഡേഴ്സ് ഡെവലപ്മെന്റ് ഇന്സ്റ്റിറ്റ്യൂട്ട് ആണ് ധാരണാപത്രം ഒപ്പിട്ടത്. രാജ്യത്ത് യോഗ കോഴ്സുകള് ആരംഭിക്കുന്നതിന് ധാരണാപത്രം വഴിയൊരുക്കും.
ഇന്ത്യന് സ്ഥാനപതി ഡോ. ഔസഫ് സയീദും സൗദി സ്പോര്ട്സ് മിനിസ്ട്രിയുടെ ലീഡേഴ്സ് ഡെവലപ്മെന്റ് ഇന്സ്റ്റിറ്റ്യൂട്ട് ഡയറക്ടര് അബ്ദുള്ള ഫൈസല് ഹമ്മദും തമ്മില് ഒപ്പിട്ട ധാരണാ പത്രം യോഗയുമായി ബന്ധപ്പെട്ട മേഖലയില് ഗവേഷണം, പഠനം, പരിശീലനം എന്നിവയ്ക്കുള്ള സഹകരണവും ഉറപ്പാക്കും. അന്താരാഷ്ട്ര യോഗ ദിനവുമായി ബന്ധപ്പെട്ട് റിയാദില് സംഘടിപ്പിച്ച ചടങ്ങിലായിരുന്നു ധാരണയിലെത്തിയത്.
