കൊല്‍ക്കത്ത/ന്യൂദല്‍ഹി: തുര്‍ക്കിയില്‍ വച്ച് രണ്ടുവര്‍ഷം മുന്‍പ് നിഖില്‍ ജയ്‌നുമായി നടന്ന വിവാഹചടങ്ങിന് ‘നിയമസാധുത’ ഇല്ലെന്ന് അവകാശപ്പെട്ട് നടിയും തൃണമൂല്‍ കോണ്‍ഗ്രസ് എംപിയുമായ നുസ്രത് ജഹാന്‍. ഇരുവരും തമ്മിലുള്ള ബന്ധത്തില്‍ പ്രശ്‌നങ്ങളുണ്ടെന്ന റിപ്പോര്‍ട്ടുകള്‍ക്കിടെ, വളരെ മുന്‍പുതന്നെ വേര്‍പിരിഞ്ഞതാണെന്നും ഇക്കാര്യം സ്വകാര്യമായി സൂക്ഷിക്കാന്‍ ആഗ്രഹിക്കുന്നതിനാല്‍ ഇതേപ്പറ്റി സംസാരിക്കാന്‍ ആഗ്രഹിക്കുന്നില്ലെന്നും അവര്‍ വ്യക്തമാക്കി.
‘വിദേശരാജ്യമായതിനാല്‍, തുര്‍കിഷ് വിവാഹ നിയമപ്രകാരമായതിനാല്‍, ചടങ്ങ് അസാധുവാണ്. അത് മിശ്രവിവാഹമായിരുന്നു. ഇതിന് പ്രത്യാക വിവാഹ നിയമം അനുസരിച്ച് ഇന്ത്യയില്‍ സാധുതയാവശ്യമാണെങ്കിലും അതുണ്ടായിട്ടില്ല. കോടതിയുടെ നിയമപ്രകാരം അത് വിവാഹമല്ല, ബന്ധം മാത്രമാണ്’. -31 കാരിയായ നുസ്രത് ജഹാന്‍ പറഞ്ഞതായി എഎന്‍ഐ റിപ്പോര്‍ട്ട് ചെയ്തു.
‘അതുകൊണ്ട് വിവാഹമോചനമെന്ന ചോദ്യം ഉദിക്കുന്നില്ല’ എന്നും അവര്‍ കൂട്ടിച്ചേര്‍ത്തു. 2019-ലായിരുന്നു ഇരുവരും തമ്മിലുള്ള വിവാഹം. നിഖില്‍ ജയ്‌നൊപ്പം സന്തോഷത്തോടെയാണുള്ളതെന്ന് വിവാഹത്തിന് ശേഷം നടി ട്വീറ്റ് ചെയ്തിരുന്നു. വിവാഹം ‘സാധുവല്ല, നിയമപരമല്ല, നിലനില്‍ക്കുന്നതല്ല’ എന്നതില്‍ എംപി ഉറച്ചുനില്‍ക്കുന്നു.
അതുകൊണ്ട് നിയമത്തിന്റെ കണ്ണില്‍ അത് വിവാഹമേ അല്ലായിരുന്നുവെന്ന് ബംഗാളിലെ ബസിര്‍ഹതില്‍നിന്നുള്ള എംപിയായ നുസ്രത് ചൂണ്ടിക്കാട്ടുന്നു. മൂന്നരലക്ഷം വോട്ടുകള്‍ക്കായിരുന്നു 2019-ല്‍ നുസ്രത് ജഹാന്റെ വിജയം. തൃണമൂലിനുവേണ്ടി മത്സരരംഗത്ത് ഇറങ്ങിയ 17 സ്ത്രീകളില്‍ ഒരാളായിരുന്നു നുസ്രത്.
