തിരുവനന്തപുരം: അറബിക്കടലില് രൂപംകൊണ്ട ന്യൂനമര്ദത്തിന്റെ സ്വാധീനത്താല് കേരളത്തിലെ വടക്കന് ജില്ലകളില് തുടര്ന്നുള്ള ദിവസവും അതിതീവ്ര മഴയ്ക്കു സാധ്യതയുണ്ടെന്നു കേന്ദ്ര കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. ഇതേ തുടര്ന്ന് തിരുവനന്തപുരം, കൊല്ലം, പത്തനംതിട്ട ജില്ലകളില് നാളെ റെഡ് അലേര്ട്ട് പ്രഖ്യാപിച്ചു. മഴയുടെ തീവ്രത കണക്കിലെടുത്ത് മേയ് 16ന് ഓറഞ്ച് അലേര്ട്ടും 15, 17 തീയതികളില് യെല്ലോ അലേര്ട്ടും പ്രഖ്യാപിച്ചിട്ടുണ്ട്.
തീരങ്ങളില് കടലാക്രമണം ശക്തമാകാന് സാധ്യതയുള്ളതിനാല് ജാഗ്രത പാലിക്കണം. ആവശ്യമായ ഘട്ടത്തില് മാറി താമസിക്കണം. മത്സ്യബന്ധനോപാധികള് സുരക്ഷിതമായി വയ്ക്കണം. അടച്ചുറപ്പില്ലാത്ത വീടുകളില് താമസിക്കുന്നവരും മേല്ക്കൂര ശക്തമല്ലാത്ത വീടുകളില് താമസിക്കുന്നവരും വരും ദിവസങ്ങളിലെ മുന്നറിയിപ്പുകളുടെ അടിസ്ഥാനത്തില് സുരക്ഷയെ മുന്കരുതി മാറി താമസിക്കാന് തയാറാകണം. കാറ്റില് മരങ്ങള് കടപുഴകി വീണും പോസ്റ്റുകള് തകര്ന്നു വീണും ഉണ്ടാകാനിടയുള്ള അപകടങ്ങളില് ജാഗ്രത പുലര്ത്തണമെന്നും അധികൃതര് നിര്ദേശിച്ചു.
