ശിവപാര്വതിമാരുടെ പുത്രനും ശിവഗണങ്ങളുടെ നായകനുമാണ് ഗണപതി. വിഘ്നങ്ങളകറ്റുന്ന ഗണപതി, വിഘ്നേശ്വരനാണ്. അറിവിന്റെ അധിഷ്ഠാന ദേവതയാണ് ഗണപതിയെന്നും അതിനാലാണ് ആദ്യാക്ഷരം കുറിക്കും മുമ്പ് ‘ഹരിഃ ശ്രീഗണപതയേ നമഃ’ എന്ന് പ്രണമിക്കുന്നതെന്നും ഒരു പക്ഷമുണ്ട്.
അഭീഷ്ടവരദായകനായ ഗണപതിയെ വിവിധ ഭാവങ്ങളില് ആരാധിക്കാറുണ്ട്. അവയുടെ ഫലസിദ്ധികള് ഇങ്ങനെ:
ബാലഗണപതി അഭീഷ്ട സിദ്ധിയും വീരഗണപതി ശത്രുനാശവും ഉച്ചിഷ്ട ഗണപതി വ്യവഹാരങ്ങളില് വിജയവും വ്യാപാരാഭിവൃദ്ധിയും നല്കുന്നു.
ഭയങ്ങള് അകലാനും സമൃദ്ധിക്കും ശക്തിഗണപതിയെ ആരാധിക്കാം. ലക്ഷ്മീവിനായകന് സമ്പത്തും ഐശ്വര്യവും നല്കും. ബാധയകലാനും വിഘ്നങ്ങള് മാറാനും വിഘ്നഗണപതിയേയും സര്വാഭീഷ്ട സിദ്ധിക്കായി മഹാഗണപതിയേയും ഭജിക്കുക. ഹരിദ്രാഗണപതിയുടെ അനുഗ്രഹം നേടിയാല് സദ്സന്തതികളെ ലഭിക്കും.
സങ്കടഹരഗണപതി ദുഃഖങ്ങളകറ്റിയും ഋണമോചനഗണപതി കടബാധ്യതകളില് നിന്ന് മുക്തി നല്കിയും അനുഗ്രഹിക്കും. ലോകവശ്യത്തിന് ത്രൈലോക്യമോഹനഗണപതിയെ പൂജിക്കണം. മന്ത്രസിദ്ധിക്കും ആഗ്രഹസാഫല്യത്തിനും സിദ്ധിഗണപതി തുണയാകും. പെട്ടന്നുണ്ടാകുന്ന തടസ്സങ്ങളെ അതേവേഗത്തില് തരണം ചെയ്യാന് ക്ഷിപ്രഗണപതിയെ പ്രസാദിപ്പിക്കുക.
അപ്പവും അടയും മോദകവുമാണ് ഗണപതിയുടെ ഇഷ്ടനൈവേദ്യങ്ങള്. ഗണപതി ക്ഷേത്രങ്ങളുടെ നടയില് തേങ്ങയുടച്ചാല് തടസ്സങ്ങള് തകര്ന്നടിയുമെന്നാണ് വിശ്വാസം. ചെമ്പരത്തി, കറുകമാല, ചുവന്നപട്ട് എന്നിവ വിനായകന് പ്രിയങ്കരങ്ങളാണ്. ഗണപതിക്ക് ഏറെ പ്രിയപ്പെട്ട വഴിപാടാണ് ഗണപതി ഹോമം.
ചിങ്ങത്തിലെ ശുക്ലപക്ഷ ചതുര്ഥിയിലാണ് ഗണപതിയുടെ ജന്മദിനം. വിനായക ചതുര്ഥിയെന്നറിയപ്പെടുന്ന ആ നാളില് ഗണപതി ഹോമമുള്പ്പെടെയുള്ള പൂജകളോടെ ഭഗവാനെ പ്രീതിപ്പെടുത്തണം.
